Prezidente MAEKOM, Rui Castro. Imajen Tatoli/Jogerjo Guterres

DILI, 05 novembru 2020 (TATOLI)–Prezidente Movimentu Asaun Ekonomia Komunitária (MAEKOM), Rui Castro sujere ba Governu liuliu ministériu implementadór atu prolonga implementasaun programa Cesta Bázika iha ámbitu rekuperasaun ekonomika ba kurtu prazu.

“Sujere Governu implementa programa Cesta Bázika la’os iha fulan-novembru no dezembru de’it, maibé se bele prolonga tan ba fulan-fevereiru 2021 hodi fó biban ba to’os na’in, haki’ak na’in no natar na’in sira prepara kondisaun balun ho didi’ak hodi responde ba nesesidade,” Prezidente MAEKOM hateten ba Agência TATOLI, kinta ne’e, iha ninia knaar fatin, Bidau.

Produtu ne’ebé MAEKOM fornese iha programa ne’e la’ós de’it bloiler maibé organiza membru mobiliza produtu seluk hanesan sabaun fase liman, batar hikis, foremungu, forekeli, no seluk tan.

“Produtu sira ne’e hahú fornese, MAEKOM rasik la tuir konkursu tanba la’ós kompañia maibé hanesan movimentu ida, tanba ne’e organiza membru sira halo produsaun hodi kontribui ba programa Governu ne’e, “ nia akresenta.

Notísia Relevante: Governu ofisialmente halo lansamentu nasionál programa Cesta Bázika

Distribusaisaun ne’e rasik hahú ona iha postu administrativu Metinaro no daudaun kontinua nafatin iha fatin ne’e no sei hala’o iha fatin seluk.

Emprezáriu ne’ebé hanesan na’in ba produtu manu bloiler ne’e garante distribuisaun iha Metinaro ne’ebé daudaun la’o hela bele hatan ba nesesidade.

“Esperiénsia loron lima iha Metinaro di’ak loos no produtu MAEKOM to’o hela, maibé ho situasaun Estadu Emerjénsia ne’ebé frontera terrestre loke iha loron kuarta de’it difikulta tanba produtu balun tenke mai hosi Indonézia, ne’ebé ninia produsaun sei la másimu,” nia hatutan.

Bainhira situasaun normál, sasán tama kada semana dala-rua (tersa no sesta), maibé agora iha kuarta de’it.

“Ninia impaktu ba produsaun sei maka’as, eseptu Governu halo polítika foun autoriza karreta sira ne’ebé tula produtu mai Timór tenke semana ida dala-rua,” emprezáriu timor-oan ne’e fó hanoin.

Maski movimentu ne’e foin hahú envolve iha atividade ekonómika Governu ho eskala boot, maibé Rui Castro otimista ho kondisaun Governu presiza halo polítika foun hodi loke fronteira ba sasán tama semana ida dala-rua hodi bele posível aumenta produsaun.

“Kuandu fronteira loke kada loron kuarta de’it no Governu deside realiza programa ne’e fazeadamente, MAEKOM sei hasoru difikuldade tanba produtu balun sei hatama hosi Indonézia, tanba ne’e presiza tempu,” nia fó hanoin.

MAEKOM otimista fornesimentu produtu to’o maibé presiza hadi’a sistema rekolla 

Rui Castro garante produtu ne’ebé fornese sei to’o maski ema barak preokupa katak produtu sei la to’o, tanba ne’e nia hanoin Governu presiza diskute didi’ak hodi rekolla produtu hosi komunidade agrikultór hodi fó susesu ba programa nasionál ne’e.

“Ema barak hateten produtu la to’o maibé ha’u otimista sei to’o, maibé presiza hadi’a mekanizmu sistema rekolla produtu. Ita iha problema boot ida maka falta koordenasaun di’ak, entaun halo ministériu ho parseiru sira daudaun ne’e sosa produtu hadau malu de’it,” nia realsa.

Prezidente MAEKOMS konsidera programa Cesta Bázika ne’e di’ak maibé urjente liu tanba produtu lokál ne’e la’ós kuda ohin aban iha rezultadu.

“Hanesan mós natar ida, foin kuda presiza fulan tolu to’o haat mak kolleta nune’e mós batar. Piór liután mak fulan-novembru no dezembru tempu udan, sei difikulta liután implementasaun tanba área balun tama zona risku dezastre naturál. Governu nia programa furak maibé la preparadu ho didi’ak,” nia fó hanoin.

Iha programa ne’e, Governu fó ba emprezáriu sira atu sosa produtu lokál hafoin halo pakote no fahe filafali.

“Osan ba atividade ne’e boot, emprezáriu sé maka iha osan atu ba hola sasán no fahe, hafoin hatama ba invoice Governu hodi selu no emprezáriu sé mak agora iha osan tanba aleinde osan, presiza iha produtu ho kapasidade boot hodi responde kuantidade ho osan millaun $71,” nia esplika.

Emprezáriu ne’e nota mós katak sistema aprovizionamentu kontratu la fó dalan atu ba Governu halo pagamentu adiantadu ba kompañia sira.

Tanba ne’e, nia husu ba ministériu implementadór atu halo avaliasaun ba implementasaun Cesta Bázika iha postu administrativu Metinaro, munisípiu Dili molok kontinua ba munisípiu seluk.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here