Komisáriu CAC, Sergio Hornai, Inspetór Jerál Estadu (IGE), Francisco de Carvalho ho Komisáriu CFP Asuntu Dixiplinár, Fausto Freitas da Silva, sai oradór iha semináriu disemina medida prevensaun luta kontra korrupsaun iha Ministériu Defeza, Fatuhada, Dili. Imajen/CAC

DILI, 05 Novembru 2020 (TATOLI)- Ministru Defeza (MD), Filomeno de Jesus Paixão, afirma korrupsaun hanesan inimigu boot ida ba Estadu no bele afeta ba povu nia moris di’ak bainhira instituisaun Estadu la halo prevensaun ba korrupsaun.

Ministru Filomeno Paixão afirma lia hirak ne’e iha nia diskursu bainhira hala’o abertura ba semináriu nasionál hodi disemina medida prevensaun no luta kontra korrupsaun hodi promove governasaun di’ak iha salaun Ministériu Defeza, ohin, iha Dili.

Semináriu ne’e nu’udar rezultadu kooperasaun entre Ministériu Defeza no Komandu FALINTIL-Forsa Defeza Timor-Leste (F-FDTL) ho Komisaun Anti-Korrupsaun (KAK), Komisaun Funsaun Públika (CFP) no Inspetór Jerál Estadu (IGE).

Filomeno Paixão dehan, atu luta kontra korrupsaun presiza hetan apoiu hosi sidadaun hotu-hotu, liu-liu funsionáriu públiku  no ajente administrasaun Estadu hodi promove governasaun di’ak iha kada instituisaun Estadu ne’ebé sira serbí ba.

“Atu evita korrupsaun presiza kapasita mós rekursu umanu, tanba korrupsaun la’ós afeta de’it ba servisu Governu nian, maibé afeta mós ba dezenvolvimentu ekonomia no moris di’ak povu sira iha nasaun ne’e,” hateten  Filomeno Paixão.

Tuir nia, bainhira nasaun ne’e kombate korrupsaun bele promove governasaun di’ak iha instituisaun Estadu hodi hadi’a administrasaun públika ne’ebé bele fó kontribuisaun ba dezenvolvimentu Timor-Leste no moris di’ak ba povu.

Ministru Filomeno husu ba ekipa responsavel sira ne’ebé servisu iha Diresaun Nasionál Aprovizionamentu Ministériu Defeza no Komandu F-FDTL nian atu kuidadu bainhira asina dokumentu ruma kona-ba konkursu públiku no prosesu pagamentu orsamentu Estadu nian tenke kontrola ho rigor tuir andamentu administrativa no finansa Estadu nian.

“Kuidadu imi nia servisu sira iha aprovizionamentu hodi fó opiniaun di’ak ba dirijente sira bele asina ho di’ak. Tanba bainhira imi haree dokumentu ruma molok fó ba imi nia superiór katak, loloos ona maka lori  ba sira asina hodi ita bele garante iha transparénsia no asesu informasaun ba ema hotu-hotu,” nia alerta.

Iha fatin hanesan, Komisáriu Komisaun Anti-Korrupsaun (KAK), Sergio Hornai dehan, misaun atu luta kontra korrupsaun hanesan misaun ida indispensable no presiza kontribuisaun Timoroan hotu.

Sergio dehan, objetivu Estadu nian hakarak garante Estadu ida direitu demokrátiku tau preferénsia direitu fundamenta sidadaun sira nian iha oin.

Nia dehan, semináriu ne’ebé Ministériu Defeza no Komandu F-FDTL halo importante tebes hodi CAC sosializa mós lei anti-korrupsaun nian kona-ba medida prevensaun kombate krime korrupsaun relasiona ho lei foun 7/2020 no hametin governasaun di’ak iha Timor-Leste.

“Atu kombate kriminalidade korrupsaun ne’e tenke iha polítika prevensaun hahú kedas iha instituisaun Estadu, setór privadu, sosiedade no papél mídia sira sira nian,” Komisáriu Sergio Hornai hateten.

KAK rasik estabelese tiha ona Planu Estratéjiku Komisaun Anti-Korrupsaun (PECAC) 2021-2025 ne’ebé sei sosializa ba ministériu no liña instituisaun Estadu, setór privadu no públiku.

Inisiativa estabelese PECAC atu orienta no haraik responsabilidade boot ba iha (Espesialista Anti-Korrupsaun) sira atu halo akonsellamentu ba iha instituisaun Estadu no povu Timor tomak iha luta sagradu prevene no kombate korrupsaun.

PECAC 2021-2025 ne’e sei formula hosi Komisáriu Adjuntu ba Asuntu Servisu Apoiu no Kooperasaun, Alexandre Freitas ho Asesór Augusto Fatima, nu’udar diretór no giaun ida atu orienta manu-ain komisaun nian hodi halo servisu prevensaun no investigasaun kriminalidade nian.

PECAC sei ajuda Estadu no Timoroan sira bele alkansa objetivu komún no abstratu hodi halo alienasaun ba iha objetivu Estadu ninian, Timor livre hosi pratika krime korrupsaun. PECAC sei garante no asegura direitu fundamental sidadaun ninian ba iha asesu justisa.

Komisáriu KAK rekoñese asaun atu prevene no kombate korrupsaun iha Timor-Leste sei enfrenta dezafiu no obstákulu oin-oin, maibé povu hotu hamutuk ho KAK tenke iha kometimentu atu sai ema sabedouria, mensajeiru di’ak no interpreter di’ak luta kontra krime korrupsaun.

Iha fatin hanesan, Komisáriu CFP ba asuntu Dixiplinár, Fausto Freitas da Silva ne’ebé sai oradór hodi ko’alia kona-ba asuntu dixiplinár husu ba funsionáriu públiku sira iha Ministériu Defeza atu halo servisu ho dixiplina no rigór hodi kontribui ba governasaun di’ak.

“Disiplina nia benefísiu ida maka halo ita neon ba malu no hamoris ita nia interese di’ak ba malu hodi ko’alia ba malu ho di’ak. Disiplina mós iha tempu hanesan osan mean no labele uza tempu disiplina ne’e atu labele la’o pasiar bainhira ita halo servisu ba Estadu,” nia hateten.

Nia dehan, solusaun ba problema dixiplina maka ema hotu- hotu tenke kumpre regra no norma hirak ne’ebé hakerek ona iha lei no hodi tama servisu tuir oras.

Tuir nia haree, durante ne’e implementasaun regra disiplinár servisu nian  iha Timor-Leste so úniku militár sira maka di’ak liu bainhira kompara ho funsionáriu públiku sira.

Inspetór Jerál Estadu (IGE), Francisco de Carvalho dehan, presiza prevene aktu hotu- hotu hodi hetan governasaun di’ak.

“Oinsá ita atu promove governasaun di’ak, ita presiza prevene fraude hodi evita aktu hotu- hotu labele akontese para ita bele promove governasaun di’ak,” nia hateten.

Francisco dehan, bainhira ema ko’alia kona-ba governasaun di’ak presiza evita fraude sira hanesan, nepotizmu, koluzaun, mal uza rekursu Estadu, irregularidade, ilísitu, falsifikasaun ka lohi no bosok no seluk tan.

Nia dehan, Estadu Timor-Leste presiza kontrola didi’ak ezekusaun Orsamentu Jerál Estadu (OJE) kada tinan hodi implementasaun projetu Governu nian ne’ebé implementa bele fó benefísiu ba povu no nasaun Timor-Leste.

Nia fó ezemplu, OJE Timor-Leste nian, Governu implementa orsamentu fó projetu ba kompañia nasionál no internasionál dala ruma implementa OJE to’o terrenu povu ladún sente ninia benefísiu, ne’e fó prejuízu ba Estadu katak, presiza halo kontrolu ba sistema hodi hadi’a governasaun.

Nia husu atu funsionáriu sira bainhira halo servisu tenke respeitu rega hanesan responsabilidade nivel aas, estika sinseru, profisionalizmu, nivel aas, espíritu hodi hala’o servisu ho integridade, transparénsia no umildade.

Semináriu ne’e partisipa mós hosi Vise Xefe Estadu Maiór Jenerál F-FDTL, Brigadeiru Jenerál, Falur Rate Laek,­­­­­ Xefe Estadu Maiór F-FDTL, Koronél Calisto Santos COLI “COLIATI”, Brigadeiru Jenerál F-FDTL, Cornélio Ximenes “Mau-Nana” no membru F-FDTL balun inklui funsionáriu públiku sira.

Jornalista   : Eugénio Pereira

Editór        : Francisco Simões

 

HAKEREK NO HATÁN

Please enter your comment!
Please enter your name here