Veteranu no kombatente libertasaun nasionál, Marito Reis.

DILI, 05 novembru 2020 (TATOLI)—Vise-Koordenadór Komisaun Instaladora no Reprezentante Rejiaun II, Mário Nicolau dos Reis “Marito Reis”, husu ba foinsa’e sira atu banati tuir no hatutan mehi saudozu  Sebastião Gomes ne’ebé fó-aan ba mate hodi defende lia-loos.

Marito Reis hatutan, mehi saudozu Sebastião Gomes ne’ebé joven sira presiza hatutan iha tempu ohin loron mak, oinsá luta ba pás no domin ho neon ho laran  atu rai Timor ne’e bele sai nasaun ne’ebé moris iha dame-nia laran.

“Ha’u husu ba joven sira atu banati tuir saudozu Sebastião Gomes no sira seluk ne’ebé fó-aan ba mate, tanba sira-nia mate defende lia-loos hodi harii nasaun doben Timor-Leste,” Marito Reis hateten ba Agência TATOLI relasiona ho komemorasaun Loron Nasionál Juventude ne’ebé sei selebra iha 12 novembru tinan ne’e, iha nia knaar fatin Obrigado Barak, Dili, kinta ne’e.

Nia fó hanoin, saudozu sira-ne’ebé uluk fó aan ba mate tanba sira iha lema ne’ebé dehan “joven bele lakon eskola, maibé labele lakon nia nasaun”.

“Ha’u-nia sentimentu patriotizmu ba komemorasaun loron nasionál 12 novembru ba dala-XXIX mak ita-nia saudaozu sira-ne’ebé uluk fó-aan ba mate ne’e mesak estudante de’it. Maibé sira-nia lema ne’ebé hateten katak ita bele lakon ita-nia eskola tinan ida, maibé labele lakon ita-nia nasaun ba ita-nia vida tomak. Entaun, barak mak hapara sira-nia eskola, fó-aan ba luta hodi liberta rai ida-ne’e,” nia esplika.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here