DILI, 05 novembru 2020 (TATOLI) – Iha kontinuasaun torneiu futeból salaun (Futsal) Ministériu Asuntu Parlamentár no Komunikasaun Sosiál (MAPKOMS) 2020, ohin, iha kampu multifunsaun Bebora, Dili, entre ekipa maskulinu Parlamentu Nasionál (PN) kontra MAPKOMS B akontese prodús golu “udan” hosi jogadór PN ba MAPKOMS B 10-0.
Notísia Relevante : Telkomcel vs MAPKOMS 8-4
Iha jogu ne’e jogadór sira hosi PN “haka’as” ekipa uma-na’in MAPKOMS B “dada-iis la tama” tanba tenke simu derrota ida estraordináriu ho golu 10-0.
Vitória “exelente” ne’e lori ekipa futeból PN hanesan ekipa ne’ebé ba-dahuluk hetan prestasaun hanesan ekipa ne’ebé prodús golu barak liu durante lala’ok jogu torneiu Futsal ne’ebé inisia no na’in maka MAPKOMS.
Jogu ne’ebé hala’o ho fundamentu “fair play” ne’e hetan apresiasaun boot hosi ekipa rua nia adeptu sira. Maibé, “Dewi Fortuna” pertense liubá ba ekipa PN ne’ebé domina liu bola iha kampu laran hahú hosi jogu primeira parte to’o termina iha segunda parte.
Golu ne’ebé lori PN ba vitória kontribui hosi jogadór, Aquelino M.(15), Arsénio Babo (6), Niton Correia (13) hatama rua, Blasio Bria (4), no Hermenegildo (7) hatama haat. Ho nune’e, ekipa MAPKOMS B tenke rekoñese no simu sira nia derrota ohin kalan iha adeptu ua’in sira-nia futar matan.
Notísia Relevante : Ekipa feminina Telkomcel “tidin” MAPKOMS 3-1
Jornalista : Hortencio Sanchez
Editór : Francisco Simões
