Vise-Xefe Bankada FRETIlIN, Francisco Miranda Branco. Imajen/Tatoli.

DILI, 05 novembru 2020 (TATOLI)—Bankada Frente Revolusionária Timor-Leste Independente (FRETILIN) iha uma fukun Parlamentu Nasionál, enkoraja autoridade seguransa no justisa atu investiga kle’an krime agravadu Raikotu, Dili.

Notisia Relevante: Kazu Raikotu, PN-Rede Feto sujere tribunál aplika pena todan

“Bankada FRETILIN fiar no enkoraja autoridade seguransa no justisa iha Timor-Leste atu investiga kazu krime agravadu ida ne’e no kondena autór ba krime ne’e ezemplarmente, atu garante katak ita-nia povu tomak, liuliu inan feton sira labele sente inseguru iha rai ida-ne’e,” Prezidente Bankada FRETILIN, deputadu Francisco Miranda Branco, informa liuhosi komunikadu imprensa ne’ebé Agência TATOLI asesu, kinta ne’e.

Bankada FRETILIN iha Parlamentu Nasionál kondena makaas asaun krime ne’ebé akontese hasoru inan feton ida ho nia oan feto joven ida iha aldeia Terra Santa, área Raikotu, Dili ihá madrugada sesta-feira, 30 outubru liubá. Krime ne’ebé hakotu inan feton Domingas Soares nia vida no halo nia-oan feto sofre kanek fízika no psikolójika.

Bankada FRETILIN kondena makaas aktu krime sira-ne’ebé mak hakotu ita-nia inan feton Domingas Soares nia moris no hakanek ninia oan feto fízika no psikolójikamente.

Bankada FRETILIN preokupa tebes tanba iha era ukun rasik-aan ne’e povu Timor-Leste liuliu ita-nian inan-feton, joven no labarik feto sira seidauk bele sente seguru iha sira-nia uma laran rasik hanesan esperiénsia ne’ebé matebian Domingas Soares ho nia oan feto hetan.

Deputadu Francisco Miranda Branco mós hato’o sentida kondolénsia ba família enlutada matebian Domingas Soares nian, no valoriza matebian nia áktu ne’ebé “fo nia-aan rasik ba mate atu salva nia oan feto hosi violasaun seksuál.

“Hanesan ihá família ida, núkleu kiik liu sosiedade nian, oan sira sempre buka hasara tuir sira-nia inan ka aman nia hahalok. Nune’e mós, ita-nia sosiedade monu ba dekadénsia morál liuliu iha violénsia hasoru labarik feto sira, tanba mós líder sira rasik hatudu uluk ezemplu,” refere komunikadu hosi bankada FRETILIN ne’e.

Iha oportunidade ida-ne’e, bankada FRETILIN apela ba Governu, ba Organizasaun sira feto nian, ba sidadaun idak-idak, família ida-idak no sosiedade tomak atu hola parte ativa iha luta atu hamenus no halakon violénsia hasoru feto no labarik feto sira.

“Saudoza Domingas Soares nia konviksaun no korajen defende nia-oan feto, sei la lakon hosi ita-nia memória no la mate leet de’it. Maibé sai fonte reflesaun no inspirasaun hodi halibur forsa tomak sosiedade nian iha lita ba emansipasaun Feto Timor-Leste nian,” Xefe Bankada FRETILIN, Francisco Miranda Branco, hateten.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here