Foto hamutuk APFTL. Foto: APFTL

DILI, 05 outubru 2020 (TATOLI)—Alumni Parlamentu Foinsa’e Timor-Leste (APFTL), planea fó formasaun lideransa ba joven feto ho mane hamutuk ema na’in 132 husi Munisípiu 12 inklui Rejiaun Administrativa Espesiál Oe-Cusse Ambeno (RAEOA) ne’ebé orariu sei hala’o iha fulan-dezembru 2020.

Prezidente APFTL, Zaulino Gomes da Silva, informa programa formasaun no mós vizita komunidade sira liliu atu deteta problema joven sira nian ne’ebé sei hala’o iha Munisípiu tolu.

Notísia Relevante :APFTL: Kontribui Ba Pás No Dezenvolvimentu Tulun Hadi’a Nasaun

Iha Munisípiu Viqueque sei kobre Lautem, Baucau no Manatuto ho partisipante 42, Baucau ema na’in 12, Lautem 10, Viquque 10 no Manatuto 12.

Fatin daruak,  sei hala’o iha Munisípiu Manufahi hodi kobre Ainaro, Aileu, Covalima no Manufahi rasik, Manufahi reprezenta joven na’in 8, Ainaro na’im 8, Aileu 8 no Covalima 14.

No ikus liu sei realiza iha Postu Administrativu Atauro ne’ebé sei akumula partisipante husi Munisípiu Dili ema na’in 12, Ermera na’in 10, Liquiça na’in 6, Bobonaro 12, RAEOA na’in 8.

“Formasaun ne’e ita sei realiza iha dezembru atu apoiu ita-nia maluk joven feto ho mane sira iha área rurál, sira ne’ebé lakon eskola, sira ne’ebé tama iha risku, sira ne’ebé hela iha dalan ninin no sira ne’ebé la hetan oportunidade atu ezerse sira-nia talentu,” nia informa ba Tatoli iha Sede APFTL Becora Dili, kinta ne’e.

Nia dehan APFTL hakarak konsentra programa formasaun ba joven sira iha área rurál tanba durante ne’e seidauk hetan oportunidade atu partisipa iha prosesu dezenvolvimentu.

Tuir nia fundu ba implementasaun programa ne’e sei hetan apoiu husi Sekretáriu Estadu Juventude no Desportu (SEJD).

“Ami iha estimasaun katak programa formasaun ne’e sei gasta osan purvolta rihun 40-resin, ami sei hatama proposta ba SEJD depois komemorasaun loron masakre Santa Cruz Dili (12 novembru),” Zaulino hateten.

Notísia Relevante :Kongresu daruak, APFTL diskute asuntu importante tolu

Jornalista : Tomé Amado

Editór:Agapito dos Santos

HAKEREK NO HATÁN

Please enter your comment!
Please enter your name here