Imajen/Media PN.

DILI, 05 novembru 2020 (TATOLI)—Prezidente Parlamentu Nasionál, Deputadu Aniceto Longuinhos Guterres Lopes, husu ema hotu halo reflesaun ba aspetu tolu iha ámbitu komemorasaun loron nasionál ba feto Timor-Leste nian.

Notisia Relevante: GMPTL sei selebra Loron Nasionál Feto ho doasaun-raan

Komemorasaun loron nasionál feto Timor-Leste dala-45 ne’e ho tema “Promove Partisipasaun Feto iha Nível Foti Desizaun  hodi Lidera ba Mudansa no Inkluziva.”

“Komemorasaun ida-ne’e lori ita hotu halo mós reflesaun ida iha aspetu boot tolu, feto iha umanidade, feto iha evolusaun sosiedade idak-idak no feto iha evolusaun polítika no dezenvolvimentu Nasionál. Temátika tolu ne’ebé mak temi sei la elabora ida-idak iha biban ne’e maibé idak-idak  bele halo reflesaun individuál,” Aniceto Guterres hato’o aspetu tolu ne’e iha ámbitu selebrasaun loron nasionál ba feto, iha resintu Parlamentu Nasionál, kinta ne’e.

Prezidente Parlamentu Nasionál ne’e hakarak koloka no subliña  katak esénsia hosi asuntu ida-ne’e mak iha feto no iha mane ne’ebé moris iha artikulasaun komplementár.

“Tantu feto no mane iha kapasidade singularidade ne’ebé motiva malu hodi kompleta malu nune’e forma sosiedade umana ne’ebé mak dinámika no integradu,” nia hateten.

Deputadu Aniceto Guterres haktuir, istória umanidade no sosiedade idak-idak hatudu katak feto mós sofre tratamentu justu no violentu ne’ebé presiste iha sosiedade balun to’o agora.

“Ne’e la signifika mane la sofre maibé iha okaziaun ne’e ha’u fó atensaun liu ba feto nia situasaun sente no preokupa ho situasaun ida-ne’e mak ohin loron jestaun igualidade jéneru kolokadu transversalmente iha dezenvolvimentu sosiál, polítika no ekonómiku país nian,” nia dehan.

Purtantu Reprezentante eis Prezidente Grupu Feto Parlamentár Timor-Leste (GMPTL-sigla portugés), Judite Dias Ximenes, informa komemorasaun loron feto nasionál komemora iha ai-laran dala-tolu.

Komemorasaun loron nasionál ba feto ba dala-45 iha resintu Parlamentu Nasionál, kinta ne’e. Imajen TATOLI/Evaristo Soares Martins.

Nia hateten, iha okupasaun la komemora  loron ne’e maibé OPMT subar-subar komera loron nasionál feto ida-ne’e. Iha era indpendénsia komemora nafatin loron ida-ne’e tanba hakarak eleva feto hosi emansipasaun katak hakarak hasai feto sira-nia hela fatin, sira-nia uma atu lori sai ba li’ur hodi bele asesu ba edukasaun, saúde no asesu servisu públiku.

“Maibé realidade hatudu katak depois luta ba emansipasaun feto ida-ne’e ita haruka ona feto ba partisipa, asesu no nia partisipasaun kontrolu hodi hetan benefísiu maibé saida mak akontese. Realidade hatudu katak iha uma de’it feto nia seguransa laiha,” Eis Prezidente Rede Feto ne’e afirma.

Eis Deputada lejizlatura dahuluk ne’e preokupa tanba nasaun ne’e soberana maibé feto sei nafatin vítima ba nia rai laran no nia uma laran.

“Nasaun seberania ne’e iha-ne’ebé, xamada atensaun liuliu nai ulun sira. Katak, feto vulnerável sira hanesan iha Raikotu loos mak ida-ne’ebé maibé sei iha mós fatin barak. Ida-ne’e liafuan ida-ne’ebé mak hanesan feto ida, mai hosi asembleia konstituinte. Ha’u tama iha primeiru lejizlatura, maibé ohin loron ha’u la hakmatek, ha’u moris nafatin hanesan feto ativista,” nia dehan

Tanba, nia dehan, kontinua ativu atu lori estabilidade ba rai ida-ne’e tau matan ba situasaun vulneralibilidade ne’ebé mak família hasoru, feto hasoru no labarik hasoru, signifika aman mós hasoru problema ida-ne’e.

Prezidente GMPTL, Deputada Lídia Norberta dos Santos Martins,  agradese ba institusaun hotu-hotu hodi realiza komemorasaun loron feto nasionál Timor-Leste.

Prezidente GMPTL agradese ba Espoza Prezidente Repúblika, Cidália Mouzinho Nobre Lopes Guterres ne’ebé partisipa iha selebrasaun ba dala-45 ne’e.

Tuir Observasaun Agência TATOLI, iha resintu Parlamentu Nasionál nota Marie Stopes Timor-Leste halo doasaun-raan iha Parlamentu Nasionál.

Nune’e mós atividade feira hanesan promove livru, hahan tradisionál, no promove tais. Espozisaun ne’e hatudu hosi Embaixada Austrália, FOKUPERS, ADTL, ACBIT, Australian Aid, Restaurante Pro-Ema, Fundasaun Alola no Parlamentu Nasionál.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here