Sesaun plenária Parlamentu Nasionál. Imajen/TATOLI

DILI, 05 novembru 2020 (TATOLI)—Parlamentu Nasionál, aban, sei hahú halo audiénsia públika ba proposta-lei Orsamentu Jerál Estadu (OJE) 2021 ho montante biliaun $1.895.

Tuir kalendáriu ne’ebé Parlamentu Nasionál distribui kinta ne’e haktuir, audiénsia públika hahú hosi 06 novembru no termina iha 17 novembru 2020.

Parlamentu Nasionál hala’o audiénsia públika ne’e hafoin termina semináriu jornada orsamentu orsamentál loron rua (04-05 novembru 2020) iha otél Novo Turismo, Dili.

“Análize badak kona-ba faktu sira, situasaun no realidade kona-ba asuntu relatóriu nian no ko’alia kona-ba kontributu ne’ebé simu hosi entidade sira ne’ebé iha interese ba matéria ne’ebé apresia daudaun,” Rejimentu Parlamentu Nasionál artigu 34 haktuir.

Nune’e mós Rejimentu Parlamentu Nasionál (RPN) artigu 80 alínea 1 esplika, komisaun bele hala’o audiénsia públika ho entidade públika sira no entidade hosi sosiedade sivíl hodi diskute matéria lejizlativa ne’ebé apresia daudaun, no mós atu trata asuntu relevante ba interese públiku relasiona ho sira-nia kompeténsia.

Alínea 2 hosi artigu 80 ne’e hatutan, desizaun atu halo audiénsia pública ne’e kompeténsia eskluziva komisaun nian, ne’ebé deside liuhosi votasaun ordinária ho votu hosi maioria absoluta hosi Deputadu prezente.

Audiénsia públika ne’e mós Parlamentu Nasionál liuhosi Komisaun Espesializada Permanente sira husu justifikasaun Governu nian kona-ba dokumentasaun orsamentál kompostu hosi livru 1 (panorama orsamentál), livru 2 (planu anuál), livru 3-A (fundu infraestrutura), livru 3-B (munisípiu sira), livru 3-C (RAEOA-ZEESM), livru 4-AB (rúbrika orsamentál), livru 5 (parseiru dezenvolvimentu) no livru 6 (fundu espesiál-FDCH).

Proposta OJE 2021 hamutuk biliaun $1.895 kompostu hosi saláriu no vensimentu millaun $ 239,2, bens (sasán) no servisu millaun $421,49, transferénsia públika millaun $669,91, kapitál minór millaun $61,14 no kapitál dezenvolvimentu millaun $503,20.

Iha Planu Anuál Governu nian 2021 reflete kontinuasaun traballu reforma jestaun finansa públika, ne’ebé inisia susesivu Governu nian liuhosi Roteiru orsamentasaun kada programa.

Tinan fiskál 2021 hanesan tinan finanseiru dahuluk ba departamentu hotu-hotu, institutu no entidade públika sira iha governu implementam orsamentu kada programa.

Bazeia livru 2 (planu anuál) deskreve iha OJE 2021 integra programa hamutuk 141, sub-programa 431 no totál atividade hamutuk 1,837.

Kuadru Planeamentu kona-ba orsamentasaun kada programa bazea ba Planu Estratégiku Dezenvolvimentu (PED) 2011-2030 no Objetivu Dezenvolvimentu Sustentável (ODS 2030), hanesan dokumentu estratéjiku no dokumentu polítiku.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here