Hapara abuzu seksuál. Imajen/Google

DILI, 04 novembru 2020 (TATOLI)-Tribunál Distritál Dili (TDD), liuhosi desizaun koletivu juis, ohin, aplika pena prizaun efetivu tinan-hitu (7) ba arguidu ho inisiál AS tanba komete krime violasaun seksuál ba menór hasoru lezada  inisiál AMJS.

Durante produsaun prova liuhosi deklarasaun arguidu, lezada no auto  ne’ebé konsta  Tribunál haree faktu provadu katak, iha loron  26  marsu  2018, akontese iha lezada sira nia to’os iha Suku Bairru-pité, Dili, bainhira lezada ba iha to’os atu ku ai-fariña tahan, arguidu tuir ba kumu lezada nia ibun metin  dada lezada ba iha mota kuak hodi halo violasaun.

Iha fali loron 28 marsu  2018, akontese tan  bainhira lezada atu ba nia tiun sira, arguidu tuir ba atu halo violasaun, maibé lezada dudu netik arguidu no la konsege.

Faktu provadu  mós katak, lezada ho nia prima ba hili ai-maran, lezada nia prima fila uluk tiha, depois lezada fila tuir arguidu ba rasta lezada nia-ain hodi monu tun, no halo violasaun ba lezada.

Tribunál haree  faktu provadu duni  arguidu komete krime abuzu seksuál ba menór previstu iha artigu 177 no krime agravasaun ne’ebé previstu iha artigu 182 iha kódigu penal.

Prosesu julgamentu prezide husi juiz Argentino Nunes, MP reprezenta hosi Prokuradór Jacinto Babo no arguidu hetan asisténsia legal hosi Advogada privada.

Jornalista   : Nelson de  Sousa

Editór        : Francisco Simões

HAKEREK NO HATÁN

Please enter your comment!
Please enter your name here