Tais Timor-Leste. Foto espesiál

LAUTÉM, 04 novembru 2020 (TATOLI)–Sekretária Estadu Igualdade no Inkluzaun (SEII), Maria José Fonseca de Jesus, husu ba Prezidente Autoridade Munisípiu Lautém atu promove produtu tais iha munisípiu refere tanba fetu Lautém mesak soru-na’in de’it.

“Ohin ita hare feto no mane barak mak hatais tais. Se bele, administradór Lautém promove netik maluk feto sira-nia produsaun tais ne’e tanba inan-feton sira iha Lautém ne’e mesak soru-na’in de’it,”  Maria José Fonseca de Jesus, husu ba lider munisipál ne’e liuhosi ninia intervensaun iha komemorasaun loron nasionál feto iha Postu Administrativu Luro, Munisípiu Lautém , tersa ne’e.

Sekretária Estadu ne’e hateten, feto sira iha Munisípiu Lautém ne’e maiória hatene soru tais no soru-na’in de’it, tanba ne’e presiza promove sira-nia produtu.

“Iha Munisípiu Lautém, joven no feto hotu-hotu hatene soru tais hosi aldeia to’o munisípiu. Se ita-nia funsionáriu administrasun hahú hosi munisípiu tun to’o suku no aldeia hotu-hotu uza tais, entaun produtu tais hosi feto sira sei folin maka’as tebes no sei bele ajuda ekonomia feto maluk no família sira iha Lautém ne’e,” nia hateten.

Governante ne’e konsidera, liuhosi promosaun produtu tais ne’e bele aumenta ekonomia ba feto sira, liuliu nesesidade família uma laran bele forte liután iha parte finanseira.

“Ha’u fiar katak, prezidente autoridade munisipál, administradór postu administrativu sira, xefe suku no xefe aldeia sira sei promove produtu tais feto Lautém ne’ebé sai forte liután iha sira-nia kbiit finanseiru,” nia dehan.

Notísia Relevante: Governu husu feto Timor-Leste banati tuir dixiplina eroina sira-nian

Jornalista: Osória Marques

Editór: Câncio Xiemenes

 

HAKEREK NO HATÁN

Please enter your comment!
Please enter your name here