Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, Imajen TATOLI/Egas Cristovão

DILI, 04 novembru 2020 (TATOLI)–Iha ámbitu reuniaun Konsellu Ministru (KM), Xefe Governu halo aprezentasaun ida kona-ba planu asaun seguransa alimentár.

“Primeiru-Ministru, Taur Matan Ruak no reprezentante nasionál hosi Movimentu Scalling Up Nutrition (SUN), halo aprezentasaun ida ba Konsellu Ministru kona-ba estrutura no rezultadu komun kona-ba planu asaun konsolidadu nasionál seguransa alimentár no nutrisaun nian,” Ministru Prezidénsia Konsellu Ministru, Fidelis Manuel Leite Magalhães, relata hafoin ramata reuniaun KM iha Palásiu Governu, kuarta ne’e.

Portavóz Governu ne’e esplika, planu ne’e aprezenta prioridade prinsipál ne’ebé sei kumpre hosi ministériu relevante, parseiru, organizasaun naun governamentál inklui sosiedade sivíl ne’ebé envolve hodi atinje Objetivu Dezenvolvimentu Sustentável 2 ne’ebé mensiona redusaun má nutrisaun no inseguransa alimentár iha Timor-Leste to’o tinan 2030.

Notísia Relevante: Governu hatudu kompromisu kombate sub-nutrisaun liuhosi adezaun ba SUN Movement

Iha loron 13 outubru, Governu Timor-Leste adera ba Movimentu SUN ho hanoin ida atu kontribui redúz índise sub-nutrisaun no mortalidade infantíl no asegura dezenvolvimentu sosiedade ida saudável no ativa ho labarik sira ne’ebé han di’ak, família prósperu no populasaun forte.

Movimentu SUN estabelese iha tinan 2010, ho vizaun atu forma dalan foun ida ba servisu kolaborasaun entre nasaun membru sira hodi erradika má nutrisaun no membru sira lidera atu unifika parte hotu sai forsa koletivu hodi hadi’ak nutrisaun iha idaidak ninia país.

Iha ajénsia internasionál hamutuk 100 maka apoiu ba movimentu ne’e inklui nasaun 61 mak sai membru, ne’ebé Timór-Leste tama iha númeru 62.

SUN la’ós fundu no la’ós ajénsia ida, maibé hanesan movimentu ho mekanizmu ne’ebé lidera hosi Governu rasik atu halo entidade hotu serbisu hamutuk atubele hadi’a nutrisaun.

Ninia prinsípiu maka serbisu hamutuk ho transparénsia, inkluzividade, bazeia ba diretu, vontade halo negosiasaun, previzilibilidade, efikásia kustu, komunikasaun kontinua, hala’o ho integridade, respeita malu, no la halo a’at ka estraga.

Hanesan membru SUN, Timor-Leste iha oportunidade atu aprende hadi’a nutrisaun hosi nasaun membru sira inklui iha oportunidade haree tuir progresu nasaun seluk no iha oportunidade esforsu nasionál, multisetorál inklui hili prioridade importante hodi atinje ODS 2, nune’e bele utiliza di’ak liután konsellu nasionál seguransa ai-han nutrisaun ne’ebé Governu rasik estabelese ona iha 2012.

Nu’udar membru SUN, iha knaar relata progresu liga ba objetivu movimentu ne’e, ne’ebé sei relata hosi pontu fokál sira no sei partisipa iha reuniaun nasionál no internasionál volutariamente no importante liu maka presiza iha pájina ofisiál ida hodi atualiza progresu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here