Prezidente Institutu Politékniku Betano (IPB), Acácio Cardoso Amaral. Foto espesiál

DILI, 04 novembru 2020 (TATOLI)—Prezidente Institutu Politékniku Betano (IPB), Acasio Cardoso, informa Instituisaun loke ona vaga dala tolu tutuir malu ba públiku atu hanorin iha área konstrusaun sivíl maibé rezultadu teste fó sai valór kandidatu sira-nia menus husi 30.

Kandidatu na’in 30 maka hatama karta aplikasaun no sira balun antes ne’e  hasai ona lisensiatura (S1) no mestradu (S2) iha nasaun Austrália no Portugal maibé la akreditadu iha ezame atu hanorin iha IPB.

Notísia Relevante :2020, IPB loke vaga ba estudante 300

“Ita loke prosesu rekrutamentu ba vaga ualu iha konstrusaun sivíl ne’e dala tolu ona, iha fulan kotuk ita loke tan maibé rezultadu ikus kandidatu na’in ida de’it mak pasa ho valór 76 no vaga hitu seluk laiha kandidatu ida mak priénse tanba valór iha de’it 30 mai kra’ik,” nia informa ba jornalista sira iha Kampus Universidade Nasionál Timor Lorosa’e (UNTL) Dili, kuarta ne’e.

Atu responde ba vaga hitu seluk ne’ebé sei mamuk, nia esplika IPB planea sei kontratu dosente provizóriu hamutuk ema na’in hitu hodi hanorin para hein prosesu rekrutamentu foun tuirmai iha tempu badak.

“Tanba ita enfrenta hela krize dosente iha konstrusaun sivíl ne’e duni agora daudaun ita kontratu hela dosente na’in hitu hodi ajuda prosesu aprendizajen iha IPB atu nune’e bele tulun estudante sira labele lakon sira-nia matéria,” nia hateten.

Nia klarifika prosesu rekrutamentu no teste la’o tuir prosedementu legál ne’ebé maka iha  tanba kandidatu sira halo teste uza komputadór no hetan akompamentu direta husi ekipa juri liuhosi projetór.

“Rezultadu ikus fó sai kedan tan ne’e laiha sistema manipulasaun se mak liu no laliu,” nia dehan.

Bazeia ba estatutu IPB ne’ebé iha estabelese kursu  maka Eskola Superiór Agronomia no Zootéknia (ESAZ) no Eskola Superiór Enjeñaria (ESE).

Iha Eskola Superiór Agronomia no Zootéknia (ESAZ) iha kursu Produsaun Animál no kursu sira seluk sei estabelese iha futuru hanesan saúde animál, prosesamentu alimentár, floresta no agronomia.

Iha Eskola Superiór Enjeñaria (ESE) nia okos kursu Konstrusaun Sivíl ne’ebé la’o ona no kursu seluk ne’ebé sei loke iha futuru mak hanesan IT (Informasaun Teknolojia), Mekánika no Eletrónika.

Entretantu, tuir dadus to’o  2019 Departamentu Produsaun Animál (PA) iha estudante na’in 247 iha tinan 2017 na’in 116, tinan 2018 na’in 49, tinan 2019 na’in 82. Enkuantu, estudante hosi Konstrusaun Sivíl iha na’in 167, tinan 2017 iha na’in 59, tinan 2018 na’in 38 no tinan 2019 iha na’in 70.

Nune’e mós iha staff administrasaun na’in-17 no dosente na’in-25, estrutura 3, Produsaun Animál iha na’in-ualu (8), destakadu na’in-tolu (3) no materiá jerál na’in-haat (4).

Sistema aprendijazen iha IPB, nia haktuir, aplika ano zero ba semestre 1 no 2, tinan akadémiku semestre 3 to’o 6. Karik estudante sira-nia IPK-Index Prestasi Kuliah ka Índise Dezempeñu Akadémiku la to’o 2.0, sira labele kontinua ba tinan akadémiku alias “DO-Drop Out’.

Entretantu, Institutu Politékniku Betano (IPB) daudaun ne’e iha ona dosente hamutuk 31 no sei prezisa tan purvolta na’in hitu ne’ebé sei koloka ba iha área kosntrusaun sivíl.

Notísia Relevante :IPB sei fó graduasaun dahuluk ba estudante finalista 158

Jornalista : Tomé Amado

Editór:Agapito dos Santos

HAKEREK NO HATÁN

Please enter your comment!
Please enter your name here