Prezidente Tribunál Rekursu, Deolindo dos Santos. Imajen Tatoli /Egas Cristovão

DILI, 04 novembru 2020 (TATOLI)-Prezidente Tribunál Rekursu (PTR), Deolindo dos Santos, ohin, hala’o audiénsia ho Primeiru-Ministru (PM),Taur Matan Ruak, hodi informa servisu Tribunál nian.

“Atu informa ba Primeiru-Ministru kona-ba servisu Tribunál nian tanba ita atu tama fin do ano ona, saida mak   Tribunál halo ona no saida mak seidauk, oinsá atu ultrapasa,” PTR, Deolindo dos Santos, hateten ba  jornalista iha Palaçio do Governo.

Nia hateten, servisu Tribunál nian hatudu prosesu ne’ebé iha andamentu normal tanba ho mudansa ne’ebé akontese iha tempu hirak liubá hatudu rezultadu  iha diminuisaun signifikante.

Prosesu  akumuladu iha Tribunál Rekursu (TR) daudaun iha de’it prosesu 18, Tribunál Distritál Dili uluk iha prosesu krime 2000-resin agora tun ba 1700,Tribunál Distritál Suai uluk iha prosesu krime 1000-resin agora tun  ba 805, Tribunál Distritál Baucau uluk iha prosesu krime  1000-resin agora tun ba 400-resin,Tribunál Distritál Oe-cusse  uluk iha prosesu krime   500-resin agora tun ba 400.

“Ida ne’e hatudu iha mudansa ba diminuisaun prosesu sivíl iha servisu Tribunál nian,” Deolindo hateten.

PTR Deolindo dos Santos informa mós ba Xefe Governu kona-ba servisu jestaun ba orsamentu 2020  ne’ebé sei laiha problema ho ezekusaun ba atividade sira hanesan prosesu julgamentu movel ne’ebé la’o iha munisípiu sira.

PM Taur  fó apoiu tomak ba servisu Tribunál nian  no mantén ritmu servisu ne’ebé daudaun di’ak ona atu di’ak liu tan no  mantein Tribunál movel ne’ebé la’o atu bele fasilita  populasaun ne’ebé hela iha area remota bele asesu justisa ne’ebé lais liután.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here