Ministru Justisa, Manuel Cárceres da Costa. Imajen Tatoli/Egas Cristovão

DILI, 04 novembru 2020 (TATOLI)—Governu liuhosi desizaun Konsellu Ministru iha tinan 2019 aprova pedidu Ministériu Justisa (MJ) atu sosa pistola ba Polísia Sientífika Investigasaun Kriminál (PCIC, sigla portugés).

Desizaun ne’e bazeia ba dekretu-lei 15/2014 ne’ebé altera ba lei númeru 21/2014 kona-ba lei orgánika PCIC iha artigu 20, ne’ebé mensiona Polísia Sientífika bele uza no lori pistola bainhira halo investigasaun kriminál.

Ba kestaun ne’e, Ministru Justisa, Manuel Cárceres da Costa, klarifika utilizasaun pistola ne’e iha ninia regra.

Sira la’ós uza kilat parlenta loron-loron iha estrada, bainhira sira simu orden hosi Tribunál ka Ministériu Públiku atu bá kaer kriminozu ida maka foin lori pistola, no bainhira hotu sei hatama filafali iha armamentu ka gudang senjata, ne’ebé iha regra empeñamentu,” Ministru Cárceres informa iha Palásiu Governu, kuarta ne’e.

Notísia Relevante: Governu Sosa Uluk Pistola 50 ba PCIC

Iha tinan kotuk, Governu deside sosa uluk pistola caliber 9×99 mm hamutuk 50 ho totál kustu $100.000.

Tuir governante ne’e, pistola importante atu reforsa serbisu PCIC halo invertigasaun ba kazu krime organizadu.

“Sira tenke iha pistola, tanba  atu proteje sira-nia an no sira la’ós atu halo investigasaun kriminál de’it maibé simu mandadu kapturasaun hosi Ministériu Públiku ka Tribunál atu ba kaer ema ne’ebé lori droga, tanba ne’e bainhira bá kaer liman tanan de’it ema bele ba hurlele PCIC no kazu ne’e bele lakon tiha de’it,” nia esplika.

Ministru dehan, tempu badak Polísia Sientífika sei uza pistola no MJ maka sei kontrola utilizasaun.

Regra empeñamentu ba uzu arma PCIC bazeia ba regulamentu 25/2018,  tanba ne’e sira la naran uza bainhira laiha mandadu ruma hosi órgaun kompetente. kuandu sira viola maka sei hasai direitu pesoál no bainhira uza la loos duni sai de’it,” nia subliña.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here