Prezidente Repúblika, Francisco Guterres 'Lú-Olo'. Imajen Tatoli/Antonio Goncalves

DILI, 04 novembru 2020 (TATOLI)—Ho autorizasaun hosi Parlamentu Nasionál, Prezidente Repúblika Francisco Guterres ‘Lú Olo’, ohin, deklara Estadu Emerjénsia dahitu liuhosi dekretu prezidensiál ne’ebé publika iha Jornál Repúblika, iha 27 outubru 2020, no ho deklarasaun ida-ne’e Timor-Leste tama iha Estadu Emerjénsia dahitu.

“Ita hatutan dala ida tan tanba Timor-Leste sei hasoru nafatin risku boot, enkuantu vírus Corona hada’et makaas hela, husi ema ba ema, iha mundu tomak,” Prezidente Repúblika, Francisco Guterres ‘Lú Olo’  deklara EE liuhosi ninia mensajen ba nasaun iha Palasiu Prezidensiál Nicolau Lobato, Bairu-Pité, Dili, kuarta ne’e.

Xefe estadu hatutan, iha loron ne’ebé Prezidente Repúblika husu autorizasaun hosi Parlamentu Nasionál atu deklara estadu emerjénsia, númeru ema afetadu no mate hosi moras COVID-19 aas tebes iha mundu.

Tuir Organizasaun Mundial Saúde, iha loron 26 de outubro 2020, ema moras iha mundu tomak besik ona millaun 40 no liu millaun ida mak mate ona  ho moras  COVID-19.

“Ita preokupa liuliu ho situasaun iha ita-nia rai viziñu, liuliu ho Indonézia, ne’ebé iha fronteira-rai ho ita,” Xefe estadu hateten.

Kazu pozitivu ida tan rejista iha Timor-Leste, tama-mai hosi fronteira-rai ho Indonézia maibé pesoál saúde kontrola hela iha fatin-izolamentu.

Númeru kazu konfirmadu COVID-19, iha provínsia tolu nulu resin haat Indonézia nian, inklui iha Nusa Tengara Timur (NTT) aas tebes, hamutuk besik rihun atus haat (400.000) ona mak pozitivu no ema liu rihun sanulu resin tolu (13.000) mak mate ona. 

Iha fulan outubru, moras COVID-19 sa’e makaas tebes iha Indonézia no Iha loron 25 outubru de’it, ema liu rihun tolu atus hitu (3.700) mak hetan moras ne’e no kuaze atus ida (100) mak mate iha Indonézia no iha Nusa Tengara Timur (NTT) de’it, iha ona kazu konfirmadu atus neen lima nulu resin rua (652).

“Ita-nia populasaun kiik tebes. Ema mak ita-nia rikusoin boot liu.  Ita-nia país laiha meiu atu kontrola bainhira COVID-19 da’et ona ba komunidade. Ita lakohi moras ne’e da’et ba ema ida! Ita lakohi lakon ema ida tanba COVID-19! Enkuantu matenek-na’in sira seidauk deskobre vasina, atu ita bele proteje-aan hosi vírus corona, Timor-Leste iha de’it dalan ida: hatutan estadu emerjénsia hodi bele aplika regra kuarentena iha pontus entrada.  Tanba ita hatuur kuarentena ba ema hothotu mai hosi rai-liur mak COVID-19 seidauk hada’et ba komunidade. Biar Estadu emerjénsia suspende ka limita direitu ema-nian, ita hotu tenke simu. Ho Estadu Emerjénsia, ita defende sidadaun nia direitu boot liu:  direitu ba vida no moris saudável ba beibeik,” Xefe estadu ne’e alerta.

Aman nasaun ne’e mós apela ba ema hotu tenke kuidadu-aan nafatin, proteje família no komunidade hosi COVID-19,  ida-idak tenke  kumpre medida sira hanesan: fase liman ho sabaun, molok tama loja no fatin públiku no molok han; obrigatóriu uza máskara bainhira hetan malu ho ema iha eventu kulturál, relijiozu, kazamentu no seluk. Tenke uza mós máskara bainhira bá merkadu, loja no supermerkadu ka fatin ho ema; hadook-an malu metru ida ho balun husi ema ne’ebé la’ós família ka la hela hamutuk.

“Ita hotu tenke haktuir regra sira fó-sai iha mensájen ida-ne’e atu ita hothotu hadook-aan hosi COVID-19 no proteje malu. Estadu Emerjénsia hahú fila-fali iha Timor-Leste, hosi loron 04 novembru no sei ramata iha o3 dezembru. Husu ba maluk sira atu haktuir Governu ninia medida hodi ita hotu taka dalan ba COVID-19. Husu nafatin apoiu hosi komunidade, liuliu hela besik fronteira-rai, atu ajuda autoridade lokál atu la husik ema tama hosi dalan ilegál. Prezidente Repúblika konta ho apoiu hosi sidadaun ida-idak no hothotu. Ita-nia saúde iha ita-nia liman,” Prezidente Repúblika hateten.

Jornalista: Cipriano Colo

Editór: Cancio Ximenes

HAKEREK NO HATÁN

Please enter your comment!
Please enter your name here