Vise Prezidente Parlamentu Nasionál, Maria Angelina Lopes Sarmento, Halao Abertura Panorama Orsamentál. iha Otél Novo Turismo, Dili. kuarta (04/11). Imajen/Tatoli Egas Cristovao

DILI, 04 novembru 2020 (TATOLI)—Parlamentu Nasionál (PN) liuhosi Komisaun C (Finansa Públika) no Public Financial Management and Oversight (PFMO), ohin, realiza semináriu panorama orsamentál 2021 ne’ebé  hahú hosi loron 04-5 novembru tinan ne’e, ho objetivu atu membru komisaun C sira intende didi’ak proposta-lei Orsamentu Jerál Estadu (OJE) 2021.

Vise-Prezidente Parlamentu Nasionál, Deputada Maria Angelina Lopes Sarmento, hateten semináriu panorama orsamentál ne’e nu’udar dalan ida hodi loke perspetiva deputadu sira-nian iha debate proposta-lei OJE 2021.

Vise Prezidente Parlamentu Nasionál, Maria Angelina Lopes Sarmento. Imajen/Tatoli Egas Cristovao

“Atu hatene di’ak liután sistema jestaun finansa públika no tenke iha koñesementu kona-ba makro ekonómiku ne’ebé ita hasoru, la’ós de’it iha Timor-Leste maibé nia influénsia makro ekonómiku hosi mundu internasionál mai to’o Timor-Leste, nune’e mós impaktu hosi COVID-19 no saida mak Timor-Leste tau iha ninia medida prinsipál sira ba OJE 2021,” Deputada Maria Angelina Lopes Sarmento, ko’alia iha otél Novo Turizmu, segunda ne’e.

Vise-Prezidente Parlamentu Nasionál ne’e hatutan, deputadu sira presiza iha koñesimentu kle’an tanba tinan 2021 ne’e tenke rekupera ekonomia rai-laran. Tanba durante ne’e Timor-Leste hasoru resesu ekonómiku, impase polítika no impaktu hosi COVID-19.

“Iha tinan 2021, Governu tenke rekupera hikas fali ekonomia nasaun nian, liuhosi inovativa sira-ne’ebé Governu introdús liuhosi OJE 2021,” nia dehan. 

Iha serimónia abertura, Embaixadór Uniaun Europeia, Andrew Jacobs afirma semináriu ida-ne’e konstitui momentu importante tebes iha prosesu definisaun orsamentál ida-ne’e, tanba inisia aprezentasaun no diskusaun ba prinsipál liña sira hosi proposta ba Orsamentu Estadu ba tinan 2021.

“Ha’u felisita ema hot-hotu maka organiza semináriu ida-ne’e no espera katak bele ajuda iha aprofundamentu ba misaun parlamentár iha kontrolu ba jestaun finanseiru no orsamental no mós bele sai garantia ba responsabilidade, transparénsia no prestasaun ba konta hosi órgaun ezekutivu sira mak jere osan iha Povu nia fatin,” Embaixadór UE ne’e hateten.

Projetu PFMO-Komponente rua (2) ne’e finansiadu hosi Uniaun Europeia (UE) no kofinansiadu no halo jestaun hosi Camões,I.P. Setór prinsipál ba projetu ne’e hatama ba boa governasaun no objetivu hosi intervensaun ida-ne’e mak atu kontribui ba dezenvolvimentu sustentável Timor-Leste nian liuhosi jestaun no supervizaun ba Finansa Públika, ne’ebé transparente liu no orientadu ba sidadaun.

Semináriu ne’e hetan partisipasaun hosi deputadu na’in-13 membru sira hosi Komisaun Finansa Públika, Meza Parlamentu Nasional, Prezidente Grupu Feto Parlamentár sira hosi Timor-Leste (GMPTL-sigla portugés), Prezidente Konsellu Konsultivu hosi Fundu Petrolíferu, Prezidente Servisu Nasional Intelijénsia, Meza Bankada Parlamentar sira seluk, Sekretária-Jeral hosi Parlamentu Nasional.

Hosi semináriu ne’e, pretende atinje objetivu sira hanesan espozisaun hosi prinsipal liña orientadór sira hosi proposta Orsamentu Jerál Estadu 2021, ho objetivu atu poténsia asaun hosi deputadu sira, iha ámbitu ba avaliasaun no supervizasaun OJE 2021.

Nune’e mós avaliasaun ba prinsipál liña orientadíor sira hosi OJE 2021 ba kontrolu no Regularizasaun, nomós hosi prinsipál parseiru no finansiadór internasionál sira.

Iha semináriu ne’e partisipa hosi reprezentante Governu nian atuál Vise-Ministra Finansa, Sara Lobo Brites.

Jornalista: Evaristo Soares Martins

Editór Cancio Ximenes

HAKEREK NO HATÁN

Please enter your comment!
Please enter your name here