Jestór Klínika Bairru-Pité, Inácio dos Santos. Imajen Tatoli/Felicidade Ximenes.

DILI, 04 novembru 2020 (TATOLI)—Klínika Bairru-Pité Dili durante fulan fulan hitu ona hahú abríl to’o inísiu fulan-novembru ne’e enfrenta problema falta ai-moruk anestezia hodi halo tratamentu ba pasiente ho problema nehan.

“Husi fulan-abríl to’o agora ai-moruk anestezia atu bius nehan laiha. Ami husu kontribuisaun ba pasiente sira atu sosa rasik iha klínika privadu sira, depois  lori mai mak ami  halo tratamentu ba nehan ne’ebé moras,’’ dehan Jestór Klínika Bairru-Pité Dili, Inácio dos Santos, ba Tatoli, foinlalais iha  ninia servisu fatin.

Notísia Relevante :Setembru, Klínika Bairru-Pité deteta tan pasiente ho TBC 37

Kona-ba ekipamentu ka mákina losu nehan (dentaria), nia relata sei sufisiente hela , maibé problema boot liu mak ai-moruk laiha.

“Ekipamentu hanesan mákina losu nehan sei sufisiente hela  no mákina hamoos nehan sei kompletu hela,’’nia esplika.

Iha fulan-setembru liubá, Ministériu Saúde oferese ona ai-moruk anestezia kaixa rua, maibé estoke mamuk ona.

Entretantu, durante fulan-Setembru  pasiente ne’ebé halo tratamentu nehan iha klínika Bairrupité hamutuk na’in 109.

Notísia Relevante :Klínika Bairru-Pité Rejista Kazu Má-Nutrisaun Maioria ba Labarik

Jornalista: Felicidade Ximenes

Editór: Agapito dos Santos

HAKEREK NO HATÁN

Please enter your comment!
Please enter your name here