Membru GAM sira iha Suku Nunira, Postu Administrativu Laga, Munisípiu Baucau, halo juramentu no badame-malu. Imajen/Mídia F-FDTL

DILI, 04 novembru 2020 (TATOLI)- Xefe Estadu Maiór Jenerál FALINTIL-Forsa Defeza Timor- Leste (F-FDTL), Majór Jenerál Lere Anan Timur, hamutuk ho autoridade lokál Suku Nunira, Postu Administrativu Laga, Munisípiu Baucau, organiza, lidera no sai sasin ba ritual juramentu membru arte marsiál atu bele hakotu violénsia no kontribui ba paz.

Notísia Relevante : Asaltu iha Nunira, sunu uma-12 no na’in-rua kanek

Organizasaun arte marsiál ne’ebé  halo juramentu ba Bandeira RDTL no Bandeira FALINTIL ne’e, kompostu hosi Persaudaraan Setia Hati Terate (PSHT), Ikatan Keluarga Silat (IKS) Kera Sakti, no Kmanek Oan Rai Klaran (KORK).

Serimónia juramentu ne’ebé hala’o iha loron 30 outubru 2020, nu’udar parte ida hosi misaun ekipa ezersísiu Cobra20-2, hodi haklaken paz no hakotu violénsia ne’ebé akontese fulan hirak liubá entre membru grupu arte marsiál iha Nunira, Laga, Baucau.

Lere afirma GAM tolu halo juramentu ba iha Bandeira RDTL no FALINTIL labele taka falta de’it, maibé  tenke hatudu ho asaun no domin entre grupu juventude sira hodi lori dame ba povu atu povu labele sai tan vítima.

“Agora Suku Nunira-Laga ita tau Bandeira Nasionál RDTL no Bandeira FALINTIL, tanba ne’e bandeira rua hanesan hena baibain, maibé ita bolu sira lulik, tanba ita fakar ita nia-ran iha sira  ita leten hodi hena ne’e sai lulik. Ha’u lakohi haree imi halo tiha juramentu imi kria beibeik konflitu,”  Lere afirma bainhira ensera ezersísiu Cobra20-2 F-FDTL no serimónia juramentu ba GAM iha Suku Nunira-Laga.

Liuhosi nota komunikadu imprensa ne’ebé Agência Tatoli asesu, ohin, Majór Jenerál Lere Anan Timur dezafia membru IKS, KORK no PSHT labele halo de’it juramentu iha Laga, maibé tenke habelar mós juramentu ne’e ba munisípiu no suku sira seluk iha Timor-Leste.

Nia dehan, bainhira organizasaun tolu ne’e halo tiha juramentu maka kria beibeik problema, signifika sira nia juramentu ne’e sei la iha valór.

“Imi halo tiha dame maka kontinua halo problema  oho malu no sunu malu beibeik, entaun dame ida sira halo ne’e mós la folin ida,”  Lere hateten.

Lere dehan, bainhira ema ruma halo juramentu temi fatuk-lulik, ai-lulik, foho-lulik, rai-lulik, bee-lulik no ba Maromak nia naran tenke kumpre, se lae, juramentu ne’e sei hamosu fali dezastre ba ema nia aan.

Veteranu rezisténsia tinan 24 ne’e dehan, iha tempu funu membru FALINTIL sira halo juramentu ba Bandeira FALINTIL katak, mezmu sira mate barak, maibé sira kaer metin sira nia juramentu hodi lori Timor-Leste luta ba ukun rasik aan lakohi atu povu terus tan.

“Ha’u dehan ita moris sempre iha uma lulik ida, kuandu ita han sala lulik ne’e ita bele halo juramentu dala atus ida mós ita kontra nafatin, entaun arte marsiál sira halo juramentu, ha’u dehan ladún fiar sira halo juramentu,” nia hateten.

Komandante F-FDTL ne’e dehan, grupu GAM tolu ne’ebé halo ona juramentu  sai lisaun ba Governu hodi halo lei no justisa  ida forte para se maka halo sala nia tenke simu sansaun atu bele repete beibeik.

“Ita hanesan obriga de’it sira atu halo juramentu no problema ne’e akontese beibeik ona, tanba ne’e ita presiza reforsa justisa no lei atu sira halo sala lei ne’e mak sei fó presaun ba sira, lae  ema ida-rua  nia hahalok,  halo ema rihun ba rihun la  moris hakmatek,” nia hateten.

Nia husu ba Sekretáriu Estadu Juventude no Desportu (SEJD) liuhosi Komisaun Reguladór Arte Marsiál (KRAM) atu kontrola nafatin atividade grupu arte marsiál no grupu ritual sira bele kumpre regra hirak ne’ebé KRAM fahe no sosializa ba grupu sira.

Iha fatin hanesan Prezidente Autoridade Munisípiu Baucau, António Guterres hateten, juramentu ne’ebé arte marsiál tolu halo ne’e ba dala tolu hodi oho karau no bibi, jura ba rai-lulik sira, maibé kontinua repete problema no halo povu sai vítima.

“Grupu tolu ne’ebé ohin halo juramentu iha ne’e katak, imi ohin sente ona katak halo ona buat balun, tanba saida mak ami halo diálogu ne’e ba dala tolu ona, imi iha tinan kotuk halo juramentu ida oho karau, bibi, maibé ohin loron repete, testu ida naruk tebetebes ohin halo juramentu ne’e uluk ita ko’alia ho lian makasae, iha harohan, ba Maromak, foho-lulik, tasi-lulik, rai-lulik, no matebian sira ne’ebé oferese nia vida tomak ba luta libertasaun nasionál,”  nia hateten.

António mensiona tan, juramentu ne’ebé repete beibeik ona ne’e husu ba arte marsiál  tolu tenke  kumpre ba kompromisu ida ne’e, tanba tinan tolu akontesimentu iha fatin ne’e sai obstákulu boot ida ba sirkulasaun populasaun entre Samalari  ba Nunira, no Nunira ba Samalari, hakat liu bazar ne’ebá la di’ak.

“Ohin imi halo juramentu ho leitura ne’ebé naruk tebetebes ho konteúdu kro’at liu, tanba ne’e ha’u husu ba imi kumpre imi ba kompromisu ida-ne’e labele repete hodi fila kotuk ba malu atu oho malu tan,” nia apela.

Nia dehan, juramentu ne’ebé halo ho Komandante F-FDTL sira nia oin hanesan lider rezisténsia labele husik monu ba rai, tanba lider rezisténsia sira sai sasin importante hakarak haree moris dame no haksolok iha povu nia leet.

Prezidente Autoridade Baucau hatutan, durante ne’e nia rasik akompaña grupu GAM sira halo mós juramentu  ba Ilas São João Bosco, Santo António, São João Paulo II  ho termu asina akordu, maibé iha Baucau grupu hirak ne’e sempre hamosu problema ka konflitu.

Iha parte seluk, Komandante PNTL Munisípiu Baucau, Superintendente Xefe, Armando Monteiro, husu atu lideransa membru GAM sira tenke kontrola membru sira ne’ebé halo ona juramentu tenke sai ema di’ak hodi konsola sira nia kolega labele halo beibeik problema.

Nia dehan, iha nasaun ne’e, PNTL no F-FDTL sei servisu hamutuk nafatin,  bainhira grupu sira ne’e halo beibeik problema, sunu uma no kria konflitu, PNTL no F-FDTL sei la tolera no implementa lei hodi garante seguransa hodi lori moris hakmatek ba sosiedade.

Jornalista: Eugénio Pereira

Editór: Francisco Simões  

HAKEREK NO HATÁN

Please enter your comment!
Please enter your name here