Vise-Ministra Finansa, Sara Lobo Brites. Imajen Tatoli/Egas Cristovão

DILI, 04 novembru 2020 (TATOLI)—VIII Governu Konstitusionál lideradu Primeiru-Ministru, Taur Matan Ruak, prioritiza setór importante neen (6) iha proposta-lei Orsamentu Jerál Estadu (OJE) 2021.

Notísia Relevante: Governu prevee millaun $123 ba pakote rekuperasaun ekonómika iha OJE 2021

“Liña distribuisaun kada setór. Iha setór importante neen (6) mak hanesan dezenvolvimentu kapital sosiál (30% hosi liña distribuisaun), dezenvolvimentu ekonómiku (18%), dezenvolvimentu infrastrutura bázika (26%), dezenvolvimentu no protesaun ambiente, dezenvolvimentu institusionál (26%) no reforma ba pilár sira importante,” Vise-Ministra Finansa, Sara Lobo Brites, esplika liuhosi semináriu panorama orsamentál ne’ebé organiza hosi Parlamentu Nasionál no PFMO, iha Novo Turizmu, segunda ne’e.

Iha Dezenvolvimentu Setór Sosial, sei kria oportunidade ensinu no formasaun ne’ebé iha kualidade no inkluzivu ne’ebé bele responde ba nesesidade ekonómika, kontinua investe iha setór saúde hodi fornese servisu saúde ne’ebé iha kualidade, partikularmente atu respende ba surtu COVID‐19.

Nune’e mós hadi’a infraestrutura bee-moos no saneamentu hodi garantia kualidade moris, saúde no prevensaun ba moras.

Iha setór dezenvolvimentu ekonómiku kontinua foka ba rekuperasaun ekonómika hosi impaktu COVID‐19, fasilita investimentu setór privadu no fó prioridade ba empreza kiik no média, kria oportunidade servisu atu hasa’e produtividade nasioál no oportunidade ba ema  hotu.

Iha setór refere sei hasa’e produtividade agrikultura no seguransa ai-han liuhosi promove no kria infrastrutura foun, kanál distribuisaun no armazenamentu produtu agríkola, diversifika ekonomia no hasa’e taxa kresimentu ne’ebé inkluzivu no sustentável.

Purtantu iha setór devezenvolvimentu infrastrutura bázika mak mak halo konstrusaun ba portu sira, aeroportu sira no Estrada urbana no rural, dezenvolvimentu kapasidade lojístika ba transporte terrestre, bee no aéreu.

Iha setór dezenvolvimentu no protesaun ambiente mak  promove ambiente sustentável no promove prátika hamenus lixu tuir prinsípiu redusaun, reutilizasaun no resiklazen.

Entretantu iha dezenvolvimentu institusionál, sei konsolida institusaun defeza no negósiu estranjaieru no konsolida relasaun esterna.

Iha reforma pilár estratéjika sira mak hanesan administrasaun públika, reforma judisiál, reforma fiskál no jestaun finansa públika.

Proposta OJE 2021 hamutuk biliaun $1.895 komposta hosi saláriu no vensimentu millaun $ 239,26, bens (sasán) no servisu millaun $421,49, transferénsia públika millaun $669,91, kapitál minór millaun $61,14 no kapitál dezenvolvimentu millaun $503,20.

Notísia Relevante: Proposta OJE 2021 prevee millaun $339.605 ba fundu infraestrutura

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here