Obra Igreja Aimutin. Imajen/Espesiál

DILI, 04 novembru 2020 (TATOLI)–Prezidente komisaun harii Igreja Aimutin, Cesar Moreira, informa kontrusaun igreja konsege paradu tanba parte komisaun hasoru difikuldade mobiliza traballadór no sasán iha situasaun COVID-19, maski serbisu kuaze konklui ona.

“Iha faze ikus ne’e la’ós fásil, tanba ne’e atu kompleta serbisu ami lori ema hosi Surabaya maibé tanba COVID-19 sira tenke fila no labele halo serbisu, materiál ne’ebé ami presiza tanba osan laiha maka labele mobiliza, maski sasán balun ami uza ne’ebé iha, maibé la sufisiente atu finaliza konstrusaun fíziku,” Responsável ne’e informa ba Agência TATOLI, foin lalais ne’e, iha Igreja Aimutin.

Antes ne’e, Gabinete Apoiu Sosiedade Sivíl (GASC, sigla portugés) halo ona transferénsia orsamentu ba konta responsável sira hamutuk millaun $2,5 ba konstrusaun Igreja Aimutin, Dili, ne’ebé reprezenta 84% hosi totál orsamentu millaun $3.

Tuir Prezidente Komisaun, daudaun progresu konstrusaun fíziku atinje ona 82%, tanba ne’e parte komisaun presiza tan orsamentu atu finaliza konstrusaun.

Notísia Relevante: GASC transfere ona millaun $2,5 ba konstrusaun igreja Aimutin Dili

“Proposta hosi komisaun millaun $4,8 no proposta pasa ho millaun $3, maibé $480.000 maka seidauk simu. Tanba ne’e iha fulan hirak liubá ami halo enkontru hodi diskute, prepara dokumentu balun no Gabinete Sosiedade Sivíl prosesu ona ba Ajénsia Dezenvolvimentu Nasionál (ADN) hodi rekomenda halo pagamentu,” nia akresenta.

Cesar Moreira informa, pagamentu ne’ebé falta, komisaun atu selu traballadór no prepara materiál seluk.

Prezidente Komisaun harii Igreja Ai-Mutin, Cesar Moreira. Imajen Tatoli/Natalino Costa

“Dokumentu balun tenke prosesa no ami mós presiza selu ema no prepara materiál tanba projetu kuaze la la’o, tanba ne’e ami semana rua ona seidauk halo serbisu. Oras ne’e paradu hela maibé serbisu kuaze konklui ona,” nia hatutan.

Tuir Prezidente komisaun, konstrusaun ne’e presiza fundu barak, tanba ne’e iha ona planu atu diskute ho  entidade relevante atu husu tan adisionál hodi finaliza konstrusaun.

“Ami ko’alia ona ho membru Parlamentu atu propoin orsamentu balun tan maibé ami seidauk hatene prosesu ne’e to’o ona iha ne’ebé, tanba ne’e husu Governu halo pagamentu ba obra ne’ebé atinje ona 82%, nune’e ami bele selu traballadór no hola tan ekipamentu balun atubele konklui igreja ne’e,” Cesar Moreira hatuir.

Parte komisaun liuhosi Amu Pároku Aimutin, Padre Emanuel Lelok Talo informa ona situasaun ne’e ba Arsebispu Arkedioseze Metropolitana Dili, Don Virgílio do Carmo da Silva, inklui ho GASC no Primeiru-Ministru.

Responsável ne’e dehan, iha parte okos atu hala’o atividade sosiál no formasaun ba sarani sira.

“Sarani sira bele aluga espasu balun. Igreja labele tane liman demais, tanba ne’e obriga ami atu integra funsionamentu atividade ekonómika no formasaun ne’ebé iha relasaun ho joven sira,” nia hatutan.

Nia rekoñese durante ne’e igreja loke odomatan atu halo misa de’it maibé iha Pároku Aimutin tenta atu halo atividade seluk tan.

Entertantu planu inísiu ba kontrusaun Igreja Aimutin hahú inisia iha tinan 2014 no hahú kontrusaun iha 2015.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here