Feto Timór. Imajen/Espesiál

DILI, 03 novembru 2020 (TATOLI)—Ohin loron Timor-Leste selebra loron nasionál feto ba dala-45, relasiona ho loron ne’e, Sekretaria Estadu ba Igualdade no Inkluzaun (SEII) hakarak kontinua asegura partisipasaun feto iha nível foti desizaun tanba konsidera bele halo mudansa inkluziva.

Tema ba selebrasaun loron nasionál tinan ne’e “promove partisipasaun feto iha nível foti desizaun  hodi lidera ba mudansa no inkluziva.”

Sekretária Estadu ba Igualdade no Inkluzaun, Maria José da Fonseca Monteiro de Jesus, hateten SEII hakarak asegura feto iha nível foti desizaun no bele reprezenta iha parte hotu, nune’e bele hato’o aspirasaun liuhosi intervensaun.

“Ami hili tema ne’e atu asegura katak ami feto bainhira lidera bele halo mudansa inkluziva, tanba feto maka inan iha família, feto maka toma konta iha família, no feto maka hatene nesesidade uma laran, edukasaun no saúde. Bainhira maluk ida moras, feto maka sei tau-matan tanba komprende nesesidade  komponente oin-oin,” Sekretária Estadu ne’e tenik ba Agência TATOLI, foin lalais ne’e iha Hera.

Nia garante, bainhira feto mak sai líder iha kargu ruma bele lori mudansa ba komponente hotu iha sosiedade.

Ho nune’e, governante ne’e dehan, SEII sei kria kondisaun atu kontinua dignifika feto liuhosi fó oportunidade envolve-an iha nível foti desizaun.

“Ita iha programa hasa’e partisipasaun vida polítika no empoderamentu ekonómiku, no programa seluk ne’ebé estabelese ona iha munisípiu sira inklui Rejiaun Administrativa Espesiál Oé-cusse Ambeno (RAEOA) liuhosi  sentru empoderamentu igualidade no inklusaun sosiál ne’ebé sei hatutan programa SEII nian to’o iha nível aldeia sira,” nia akresenta.

Iha parte seluk SEII kontinua haree serbisu ho parseiru iha nível hotu.

“Parseiru la’ós de’it ba dezenvolvimentu, maibé bilaterál, mutilaterál, inklui organizasaun sosiadade sivíl sira no iha munisípiu, rejiaun atu nune’e bele serbisu hamutuk implementa atividade ne’ebé prepara ona atu asegura partisipasaun másima feto sira, ema ho difisiénsia inklui komunidade LGBT iha prosesu tomak,” nia realsa.

Sekretária Estadu otimista, ho implementasaun programa ne’ebé dezeña ona inklui apoiu finanseiru bele hakbi’it feto hosi nível hotu.

“Nune’e sira ne’ebé partisipa ativa iha prosesu oin-oin iha dezenvolvimentu no iha tempu barak nia laran bele iha kbi’it foti desizaun ba sira-nia moris inklui ba família,” nia hatutan.

Iha Parlamentu Nasionál, daudaun ne’e partisipasaun feto 38% ne’ebé ekivalente ho deputada hamutuk na’in-25 hosi totál 65 reprezentante povu.

Enkuantu iha Governu, partisipasaun feto hanesan membru Governu hamutuk na’in-hitu hosi totál 43.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here