Relatóriu CAVR "Chega!" no CVA "Ad Memoriam Ad Spem". Imajen/Media /CNC.

DILI, 03 novembru 2020 (TATOLI)–Relatóriu CAVR “Chega!” no CVA “Ad Memoriam Ad Spem” sai referénsia ba dosente Aniceto Guro Berteni Neves hodi fó hanorin ba universitáriu sira iha Universidade Nasionál Timor Lorosa’e (UNTL).

Dosente Aniceto Guro Berteni hateten, tanba iha universidade hotu-hotu iha Timor-Leste inklui UNTL rasik seidauk iha livru aseitável ne’ebé mak sai hanesan livru obrigatóriu hodi introdús istória pasadu sira ba universitáriu sira.

Aniceto Guro-Berteni Neves.

“Ho ne’e, ha’u-nia inisiativa rasik buka leitura maihosi relatóriu CVAR no relatóriu CVA nian ne’e hodi hanorin ba estudante sira iha universidade,” Dosente Aniceto Guro Berteni Neves, haktuir ba Agência TATOLI hafoin partisipa komemorasaun tinan 15 Aniversáriu Relatóriu Chega! ho topiku “Hametin no Hatutan Memória Pasadu”  iha eis Antigu Komarka Balide, Dili foin lalais ne’e.

Nia hatutan, relatóriu CVA ne’e ba periódu tinan ida de’it kuaze ba tinan 1999 nian de’it maibé relatóriu CAVR ne’e introdús informasaun barak ne’ebé hahú hosi 1974-1999.

“Ha’u uza matéria CAVR no CVA nian mak hanorin estudante sira iha UNTL, hanesan akontesementu lubuk boot ida-ne’ebé reprezenta kapitál istóriku povu TL nian maske relatóriu CAVR foka ba direitu umanu,” nia hateten.

Nia dehan matéria kona-ba relatóriu CVA ho CAVR hahú hanorin ona iha UNTL dezde tinan rua kotuk.

“Embora, iha aula, ha’u mós lori estudante sira ba fatin istóriku sira, vizita barak liu mak iha CNC hodi haree sítiu istóriku, hanesan iha Suku Bairru-Pite, Santa Cruz no Ailok-laran Munisípiu Dili nian inklui Maun boot Xanana Kay Rala Gusmão ho Taur Matan Ruak nia subar fatin. Ha’u mós  fasilita sira halo audiénsia ho parte  CNC nian hodi ko’alia kona-ba relatóriu Chega! nia informasaun ba estudante sira,” nia esplika. 

Tanba, nia dehan, CNC mós transmite saida mak akontese iha edifísiu ida-ne’e no saida mak CNC planu no oinsá bele integra iha universidade.

Aleinde fatin CNC, dosente ne’e mós lori estudante sira ba vizita Múzeu Rezisténsia Timor-Leste hafoin haruka estudante ba ida-idak nia munisípiu no suku hodi entrevista kona-ba fatin istóriku no mapamentu sira iha sira-nia suku laran.

“Ha’u hanoin lisaun hirak ne’e sei sai leitura aula ba sira-nia rasik iha universidade, entaun hosi ne’e mak sira esplora mesak ona saida mak sira aprende no peskiza iha sira-nia suku,” dosente Fakuldade Siénsia Sosiais ne’e haktuir ba Agência TATOLI.

Hosi rezultadu peskiza iha munisípiu hotu-hotu, nia haktuir, buat balun ne’ebé nia deskobre no observa mak suku balun ne’ebé iha aktu ka eroizmu tanba nia família ne’ebé determinadu tebes hodi hatudu sira-nia asaun eroizmu hodi kontra inimigu Indonézia mós seidauk hakerek nia istória.

Nia dehan. ema ho asaun eroizmu kuaze seidauk deskobre hotu no seidauk hakerek sira-nia dokumentu iha relatóriu ka iha livru ruma. Entaun, hosi introdús aula iha universidade konsege hanorin no sai leitura ne’ebé importante ba estudante sira.

“Tanba ne’e mak, ha’u hateten papél akademista sira-nian iha rua (2), embora reflreta istória ne’ebé halo monu ita-nia matan-ween ka triste maibé akademista sira transforma istória triste ba mundu liuliu Timor-Leste ne’ebé mak halo timoroan sai orgullu. Espesiál ba ema ne’ebé mak halo istória katak nia orgullu ho nia istória pasadu nian,” nia hateten. 

Tuir nia, la’ós ema boot de’it mak halo istória no konta istória maibé ema baibain mós halo istória no bele konta tuir ba jerasaun tuir mai.

Tanba, tuir nia, na’in ba luta ne’e la’ós líder politíku de’it maibé ema analfabetu mós halo asaun determinante no sira mós hola parte asaun eroizmu.

“Ida ne’e mak ita-nia deskobrementu durante peskiza iha munisípiu ne’ebé sai hanesan narrativu koletivu no sai istória nasionál ninian,” nia dehan.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here