Feto Timor-Leste. Imajen/Facebook: Maria Conceição Belo.

DILI, 03 novembru 2020 (TATOLI)—Prezidente Repúblika, Francisco Guterres “Lú Olo”, hateten Timor-Leste tinan-tinan selebra loron nasionál feto maibé seidauk tau importánsia feto nia-papél ho loloos.

“Tinan-tinan ita selebra loron nasionál feto maibé ita seidauk fó importánsia loloos ba feto ninia papél nu’udar ema no nu’udar inan ne’ebé hala’o knaar iha família, prepara ai-han nutritivu, tau-matan ba oan sira-nia saúde di’ak no haruka ba eskola, eduka sira kona-ba valór no prinsípiu sira,” Prezidente Repúblika, Francisco Guterres “Lú Olo”, hato’o mensajén iha loron nasionál feto ne’ebé selebra iha Postu Administrativu Luro, Munisípiu Lautém, ne’ebé Agência TATOLI asesu, tersa ne’e.   

Knaar sira-ne’e, prezidente hateten, feto halo hori uluk no sei halo ohin loron no ba futuru maibé Timor-Leste seidauk hatene uza potensiál feto sira-nian iha prosesu foti desizaun ba fó benefísiu barak liu ba família no ba sosiedade.

”Biar ita valoriza tebes feto sira-nia partisipasaun iha luta maibé ita seidauk valoriza ita-nia inan-feton sira iha tempu ukun-aan, nu’udar ema, sidadaun no traballadora,” Prezidente Repúblika hateten.

Rezultadu resenseamentu ikus liu halo iha tinan 2015, hosi populasaun besik millaun 1.3, populasaun feto liu rihun 600 kuaze hanesan ho populasaun mane. Númeru ne’e hatudu populasaun feto boot tebes iha Timor-Leste.

Ne’e forsa ida ne’ebé Estadu Timor-Leste tenke konsidera no tenke hala’o duni polítika inkluzaun sosiál efetivu ida atu garante feto sira-nia kbiit atu hanoin, hala’o no deside. Tanba ne’e, tempu to’o ona atu rekoñese feto sira nu’udar riin importante ida ba nasaun.

Xefe Estadu ne’e hatete, Sekretaria Estadu ba Igualdade no Inkluzaun (SEII) bele halo programa di’ak tebes maibé labele hetan susesu enkuantu sosiedade la muda hanoin no atitude kona-ba feto.

Prezidente Repúblika hatene katak iha abuzu no violénsia tipu oioin ba feto iha sosiedade ohin loron, inklui ba labarik-feto sira, laiha respeitu ba feto iha uma laran rasik, iha abuzu poder no asédiu seksuál ba funsionáriu feto sira iha servisu-fatin, iha mós abuzu ba feto iha transporte públiku no feto sai vulnerável bainhira la’o mesak.

Prezidente Repúblika haktuir feto no inan-feton sira iha Timor-Leste mós hola parte iha libertasaun nasionál ba ukun rasik-aan nian.

Prezidente Repúblika, Francisco Guterres “Lú-Olo”. Imajen Tatoli/ Egas Cristovao

“Feto rurál ida, nu’udar kombatente libertasaun nasionál, ne’ebé barani reziste ho kilat iha liman to’o mate. Ninia barani, foun-foun kedas, iha ita-nia luta libertasaun nasionál, loke neon ba kombatente hotu-hotu katak feto mós iha kbiit. Feto mós bele kaer kilat no halo funu,” Prezidente Repúblika, Francisco Guterres’Lú-oló enkoraja.

Nia dehan Uruk-Bele, ne’ebé ikus mai koñesidu liu ho naran Maria Tapó, barani hatán ba atake militar ida ho nia kilat maibé hetan tiru no mate iha Tapó, Bobonaro, iha 03 novembru 1975. Nune’e tinan tuir konsagra no selebra  nu’udar loron Nasionál Feto Timor-Leste, iha área libertada sira ne’ebé kontrola husi FRETILIN.

Hafoin TL restaura ukun rasik-aan, liuhosi lei númeru 10/2005, 10 agostu, Estadu Timor-Leste konfirma 03 novembru, nu’udar loron Nasional Feto Timor-Leste, nu’udar mós loron komemorativa ida iha rai doben ida-ne’e.

“Inan-feton sira partisipa iha luta libertasaun nasionál no balun nia-kontribuisaun hakerek ona, balun  nian seidauk. Tanba feto sira partisipa iha aspetu hotu-hotu atu  hetan ukun rasik-aan. Ita bele dehan katak ita prátika tiha ona polítika inkluzaun sosiál,” PR Lu-oló dehan.

Nia hateten, tanba hakarak haku’ak nafatin polítika inkluzaun sosiál mak Konstiuisaun RDTL, liuhosi artigu 17°, defende igualdade entre mane no feto, katak mane ka feto iha direitu no obrigasaun hanesan iha vida família nian no iha área kulturál, sosiál, ekonómika no polítika. Tanba ne’e, hosi kedas Primeiru Governu Konstitusional to’o agora, iha sempre estrutura ida hatúr iha Governu laran hodi promove igualdade jéneru.

Feto tenke iha mós oportunidade hanesan ho mane sira atu hasa’e kbiit, liuhosi edukasaun, to’o  nível aas liu, atu hakbiit-aan ho kapasitasaun tékniku-sientífika iha área ne’ebé de’it, atu hetan empregu,  partisipa ho kbiit atu halo mós desizaun ne’ebé de’it, iha vida nasaun nian.

Situasaun sira-ne’e preokupa Prezidente Repúblika no tenke preokupa sidadaun hotu-hotu. Relasiona ho kazu krime akontese sexta-feira (30/10/2020) liubá, iha Raikotu, Dili, hasoru inan-feton, Domingas Soares.

Xefe Estadu kontinua alerta ba Polísia Nasionál Timor Lorosa’e (PNTL) presiza halais prosesu investigasaun atu autór krime ne’e hetan kastigu, tuir lei haruka. Krime hanesan ne’e labele akontese tan iha rai doben Timor-Leste livre no independente. Fiar katak autoridade relevante sira sei hola medida efetivu liután hodi proteje feto no ema vulnerável sira iha sosiedade.

“Ha’u apela ba komunidade rasik atu hametin vijilánsia hodi proteje malu no taka dalan ba krime ne’ebé de’it iha ida-idak nia hela-fatin. Husi sorin seluk, ita presiza tebe-tebes uza teknolójia foun atu aprende buat di’ak, la’ós halo asédiu seksuál, liuhosi ezibisaun pornográfika ba ita-nia inan no feton sira,” Xefe Esatdu apela.

Prezidente hateten, mai hamutuk valoriza inan-feton sia, valoriza sira nu’udar ita-nia aan rasik, valoriza família, sosiedade no povu ida-ne’e. Hamutuk tane aas no domin feto Timor-Leste tanba timoroan tenke orgulla ba nasaun Timor-Leste livre no independente. 

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here