Primeiru-Ministru, Taur Matan Ruak, hamutuk ho inan-feton. Imajen/Mídia GPM

DILI, 03 novembru 2020 (TATOLI)—Primeiru-Ministru (PM), Taur Matan Ruak, felisita loron nasionál feto nu’udar loron reflesaun ba importánsia papél inan-feton sira iha prosesu dezenvolvimentu nasionál desde tempu luta.

“Hodi VIII Governu Konstitusionál nia naran no ha’u-nia naran rasik, hakarak kongratula inan-feton sira iha Timor-Leste laran tomak ba loron espesiál ida ne’e. Governu komprometidu tau ema nu’udar sentru ba dezenvolvimentu, nune’e sei halo esforsu hotu hodi envolve inan-feton sira iha prosesu dezenvolvimentu ita-nia rain,” Xefe Governu dehan liuhosi nota ne’ebé Agência TATOLI, iha tersa ne’e.

PM konsidera ohin loron nu’udar loron espesiál ba inan-feton no Governu deside nu’udar Loron Nasionál ba Feto Timor-Leste tanba koinsidénsia ho loron mate eroína bo’ot, Maria Tapó, nu’udar onra ba feto timor-oan hotu ne’ebé ho dedikasaun tomak no brani hamriik hamutuk ho asua’in mane sira iha luta kontra okupasaun estranjeira durante tinan 24.

Tanba haree papél feto importante, daudaun ne’e Governu liuhosi Sekretaria Estadu ba Igualdade no Inkluzaun (SEII), serbisu hamutuk ho organizasaun feto tau matan no valoriza inan-feton sira iha prosesu dezenvolvimentu nasionál nune’e labele sente hela iha kotuk.

SEII iha programa haat atu atinje Objetivu Dezsenvolvimentu Sustentável (ODS) hanesan abordajen intergradu jéneru, prevensaun violénsia bazeia ba jéneru, hakbiit ekonomia feto no hakbiit feto iha vida polítika.

Aleinde ne’e, SEII no Sekretariadu Tékniku Administrasaun Eleitorál (STAE) hala’o ona edukasaun sívika ba votante sira kona-ba prespetiva jéneru iha eleisaun jerál no enkoraja feto atu kandidata-an hanesan xefe suku, xefe aldeia atu tuur iha konsellu suku sira.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here