Prezidente Repúblika, Francisco Guterres “Lú Olo’, vizita no kari aifunan no reza ba eroi sira hotu ne’ebé saran-aan ba luta libertasaun nasionál iha Jardim dos Herois da Pátria, Metinaro. Imajen/Media PR.

DILI, 02 novembru 2020 (TATOLI—Prezidente Repúblika, Francisco Guterres “Lú Olo’, ohin, vizita no kari aifunan no reza ba eroi sira hotu ne’ebé sara-aan ba luta libertasaun nasionál iha Jardim dos Herois da Pátria, Metinaro, Dili.

“Ohin loron, loron matebian nian, loron espesiál tebe-tebes ba Povu Timor-Leste tomak. Sira hotu-hotu fila ba vizita sira-nia família ne’ebé mak mate sira-nia rate. Orasaun ne’ebé ami reza ne’e ba ita-nia eroi sira. Ami-nia sentimentu hamutuk ho família sira hotu, hosi Tutuala to’o fronteira, liuhosi Ataúro no Oé-Cusse, ami reza orasaun hamutuk ho família sira hotu-hotu atu fó nafatin memória ba matebian hotu-hotu iha ita-nia rain Timor-Leste,” Prezidente Repúblika, Francisco Guterres “Lú Olo’, hateten.

Imajen/Media PR.

Prezidente Repúblika kari aifunan no reza iha Kruz-Boot hodi reprezenta eroi hotu-hotu ne’ebé mate iha fatin-fatin ba kauza Timor-Leste ninian. Prezidente Repúblika kari-aifunan no reza iha rate Proklamadór Independénsia, Francisco Xavier do Amaral, Clotilde Maria de Fatima “Lou-Tik”, Konis Santana,Komisáriu Polítiku Carlos César Correia Lebre “Mau-Laka”, komandante FALINTIL Hermenegildo Augusto Pereira Alves, Abel Cabral “Loki”, Afonso Henrique Monteiro, Bendito Belo “Mau-Selou, komandante FALINTIL Virgílio Freitas “Kalisa”, Rosito Ximenes Belo, komandante FALINTIL Virgilio dos Anjos “Ular Rihik”, lider klandestina Fernando de Araújo “La-Sama”, lider klandestina Andre da Costa Belo “L4” no Jaime Ribeiro “Samba Sembilan”

Prezidente Repúblika hateten, Ministériu ba Assuntus Veteranus, Sekretáriu Estadu ba Assuntu Kombatente Libertasaun Nasionál no Konsellu Kombatente Libertasaun Nasionál sei kontinua halibur restus mortais sira. Instituisaun sira-ne’e kontinua hadi’ak Jardim dos Herois da Pátria iha nível munisipiu atu haloot eroi luta libertasaun nasionál.

Iha vizita ba Jardim dos Herois da Pátria, Prezidente Repúblika akompaña hosi espoza Cidalia Lopes Nobre Mouzinho Guterres, Chefe da Casa Civíl Francisco Maria de Vasconcelos no Chefe da Casa Militar Koronel Maukalo.

Komunikadu Imprensa

HAKEREK NO HATÁN

Please enter your comment!
Please enter your name here