Igreja Venilale.Imajen Tatoli/Nelson

VENILALE, 02 novembru 2020 (TATOLI)—Padre Paróku Venilale,Carlos Fernandes, hateten matebian sira presiza orasaun husi sarani sira nune’e bele tulun sira atu hetan moris hias iha fatin purgatóriu nian.

“Nu’udar sarani kreda fiar na’in mai ita reza hodi hanoin sira ne’ebé mate ona ba ita-nia família no mós ba ema hotu, ” dehan Amu Paróku ne’e durante selebrasaun misa loron finadu nian iha Venilale, Baucau, ohin.

Notísia Relevante :Loron finadu, orasaun família salva matebian nia klamar iha purgatóriu

Igreja Venilale.Imajen Tatoli/Nelson

Nia dehan, mate hanesan realidade ida ne’ebé maka ema idaidak tenki hasoru durante sira ninia peregrinasaun iha mundu.

“Jesus fó hanoin mai ita sarani atu hetan moris no mós prontu atu hasoru mate ne’e mai bainhira de’it ne’ebé ita lahatene,” nia hateten.

Tanba ne’e, sarani idaidak tenki prepara an atu hasoru mate tuir Maromak nia planu.

“Ita tenke agradese ba Maromak moris na’in ba ita sira ne’ebé sei moris nakonu ho grasa hodi adora iha ita-nia futar oin,” nia dehan.

Iha parte seluk, komunidade Moises dos Santos, hateten komemorasaun loron finadu kada tinan importante hodi hanoin hikas família matebian sira ne’ebé maka mate ona.

“Atividade preparasaun ne’ebé ami-nia família prepara mak hanesan hahú horikalan reza,sunu lilin,ba matebian sira ho han hamutuk,no ohin kontinua ho misa hotu sei ba tau ai-fuan iha rate,” nia esplika.

Hafoin misa família matebian idaidak lori kedas ai-funan ba karii iha semitériu Venilale nian.

Jornalista: Nelson de Sousa/Jogerjo Guterres

Editór: Agapito dos Santos

HAKEREK NO HATÁN

Please enter your comment!
Please enter your name here