Pároku Tutuala, João Sarmento, agradese ba parte Governu no sira ne'ebé durante ne'e apoiu ba prosesu re-abilitasaun. Imajen TATOLI/Rita Almeida.

TUTUALA, 01 novembru 2020 (TATOLI)–Amu Vigáriu Jerál Dioseze Baucau, Francisco Pinheiro, ohin, inaugura igreja Saun José iha Postu Administrativu Tutuala, Munisípiu Lautém.

Prosesu re-abilitasaun ne’e hetan tulun orsamentu ho montante $20 mil hosi Estadu liuhosi transferénsia públika antigu Sekretariu Estadu Kooperativa, Rotary Club, no kontribuisaun Tutuala-oan sira no osan ismola ne’ebé durante ne’e igreja simu hosi sarani sira.

“Balun la’o uluk. Balun la’o ikus. Maibé, importante duni balun tenke sai exemplar. Nune’e, hatudu ba hothotu kona-ba sentidu preténsia,” Amu Vigáriu Jerál Dioseze Baucau, Francisco Pinhero, iha nia omília, domingu ne’e.

Nia louva no agredese Tutuala-oan sira ne’ebé hatudu ona sentidu preténsia, tanba tempu agora ema barak mak sei sente prezensa igreja ne’e responsabilidade dioseze-nian.

Entretantu, Pároku Tutuala, João Sarmento Jerónimo, hafoin selebrasaun eukaristia ba sarani no konvidadu sira, hato’o agradese ba apoiu hosi Governu, Rotary Club, no sarani Tutuala-oan sira, tanba konsege termina prosesu halo foun uma-kreda.

“Bensa ne’ebé amu vigáriu husik hela ba igreja, husik hela mos iha ida-idak nia isin-lolon tomak, hodi hametin ida-idak nian fiar nu’udar sarani,” nia dehan.

Amu Vigáriu Jerál Dioseze Baucau, Francisco Pinheiro, domingu (1 novembru 2020), kuda ai-oan iha igreja suku Tutuala hanesan símbolu hamatak ka fó mahon ba igreja refere. Imajen TATOLI/Rita Almeida

Aleinde ne’e, Diretór Jerál Kooperativa, Olderico Lopes, hateten apoiu ne’ebé Estadu liuhosi transferénsia públika antigu Sekretariu Estadu Kooperativa oferese ba instituisaun relijioza bazea ba proposta hosi komunidade.

Ho proposta ne’e, nia dehan, ninia parte halo verifikasaun iha terenu ho rezultadu kondisaun igreja presiza duni hetan atensaun hosi Estadu através Sekoop.

“Governu bele fó apoiu liuhosi transferénsia públika ba setór hotu, inklui organizasaun relijioza, tulun ne’e parte hosi kontribuisaun Estadu ba igreja,” nia hateten.

Olderico Lopes informa, prosesu ikus hosi tranferénsia públika ne’e mak relatóriu.

Tutuala nu’udar rai moris fatin saudozu, komandante Nino Konis Santana.

Íkone turístika hanesan illeu iha Jaco, gruta Ili-kere-kere, tasi veru (veru sere), tasi hilapuna (hilapuna sere) no várias fauna iha fatin ne’e nu’udar riku-soin Tutuala, en-jerál Timor-nian.

Jornalista: Rita Almeida

Editór: Cancio Ximenes

 

HAKEREK NO HATÁN

Please enter your comment!
Please enter your name here