speitu ho inisiál LH, tinan 38, Imajen/foti hosi Facebook

DILI, 01 novembru (2020)—Sekretária Estadu Igualdede no Inkluzaun (SEII), Maria José da Fonseca, husu ba parte relevante sira liuliu PNTL tenke investiga no prosesa lalais kazu krime hasoru matebian Domingas Soares ho nia-oan feto LM.

Notísia Relevante: CNRT husu PNTL investiga kle’an aktu krime ne’ebé akontese iha Raikotu

“Tanba ne’e, hanesan SEII, ha’u apela ba autoridade no entidade ne’ebe kompetente hodi foti medida lalais ba invetigasaun no prosesa kazu krime hasoru matebian Domingas Soares no nia-oan feto LM.  Husu mós ba entidade relevante sira hodi koordena no fó asisténsia psikolójia no asisnténsia ba alin-feto LM atu rekopera lalais hosi trauma kauza hosi akontesementu  trájiku ida-ne’e,” Maria José da Fonseca apela liuhosi komunikadu imprensa ne’ebé Agência TATOLI asesu, domingu ne’e. 

SEII nu’udar instituisaun Govrnu sei halo mós koordenasaun ho interministeriál sira hodi halo monitorizasaun ba progressu kazu ida-ne’e no asegura vítima hetan apoia ne’ebé mak nesesária hodi nia kontinua hala’o nia-moris. 

SEII lamenta ho atetude suspeitu LH ne’ebé mak halakon feto maluk Domingas Soares iha nia-uma rasik no hakanek nia-oan feto LM.

“Nu’udar Sekretária Estadu, ha’u lamenta tebe-tebes aktu ne’ebé halakon ona inan no feto maluk ida nia moris no hakanek nia-oan feto iha nia uma-laran rasik.  Ita hotu hatene katak violėnsia hasoru feto no labarik-feto hanesan kazu violasaun direitu umanu ne’ebé penetrante liu iha Timor-Leste no hanesan mós kazu krime ida-ne’ebé mak ladún hetan julgamentu,” nia dehan. 

Tanba ne’e mak sei sai hanesan kazu ida-ne’ebé bele fo ameasa ba seguransa no dame iha uma-laran, sosiedade no iha dezenvolvimentu Estadu ida nian, SEII husu atu labele nonook de’it maibé tenke esforsu hodi hapara violénsia hasoru feto maluk sira.

“Ita labele nonook no tolera tan krime iha forma saida de’it hasoru feto no labarik-feto sira.  Ita hotu-hotu hatene katak krime hasoru feto no labarik-feto hanesan krime estruturál ne’ebé rekere ita hotu nia-asaun tantu feto ka mane, ferik ka katuas, joven feto no joven mane, labarik-feto no labarik-mane sira hamutuk halo  esforsu koletiva hodi responde no hapara aktu violénsia sira iha ita-nia sosiedade,”, nia hateten. 

Komuikadu ne’e hatete impaktu hosi violėnsia kontra feto no labarik- feto bele metin iha sira-nia moris tomak ne’ebé iha kustu makaas ba vítima família, sosiedade relasiona ho saúde, ekonómia no sosiál ba ema-nia moris di’ak.

Omisídiu hasoru inan Domingas Soares no hekanek ba oan feto LM hosi suspeitu LH ne’ebé akontese iha Aldeia Tera Santa, Raikotu, Dili iha loron Sesta-Feira, 30 outubru 2020.

SEII, hakarak hato’o sentida kondelénsia kle’an ba alin LM no farmília tomak matebian Domingas Soares iha trajédia Raikotu. 

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here