Imajen/Espesiál.

LALEIA, 01 novembru 2020 (TATOLI)—Pároku Laleia, Frei Miguel Grilo, husu ba sarani Laleia liuliu joven sira atu hakribit violénsia hodi kria paz iha sosiedade nia leet no husu atu inan-aman sira labele lori labarik sira ba asiste aktu violénsia maibé lori sira hakbesik ba igreja atu aprende Na’i Maromak nia liafuan. Atu sai santu tenke hili de’it buat ne’ebé di’ak hodi husik buat ne’ebé aat no brani hateten lae ba violénsia.

“Ha’u husu ba sarani Laleia liuliu joven sira atu hakribiit violénsia hodi kria paz iha sosiedade nia leet. Ha’u husu atu inan-aman sira labele lori labarik sira ba asiste aktu violénsia maibé lori labarik sira hakbesik ba igreja atu apreende Na’i Maromak nia liafuan tanba atu sai santu tenke hili de’it buat ne’ebé di’ak hodi husik buat ne’ebé aat no tenke brani hateten lae ba violénsia,” Pároku Laleia, Frei Miguel Grilo, haklaken liuhosi ninia omília iha selebrasaun eukaristia ba loron Santo no Santa Sira nian iha Igreja Párokia Nossa Señora do Rosário Laleia, Munisípiu Manatuto, domingo ne’e.

Pároku laleia ne’e hatutan, sarani sira tenke kuda dame iha imi-nia fuan laran tan só ho ida-ne’e de’it mak imi bele sai santu no bainhira imi hili hakarak la’o hamutuk ho Maromak. Tanba ne’e, nia husu, sarani sira hotu tenke halo esforsu hodi hili buat ne’ebé di’ak tanba bainhira hili buat ne’ebé di’ak buat hotu sei sai di’ak.

“Bainhira ema sira hakarak halo aat ba ita, ema sira tolok, bosok, no halo buat ne’ebé aat, ita la persiza halo aat hasoru. Labele tolok hasoru sira, hodi hamosu violénsia. Maibé, realidade akontese labarik sira tolok malu, sira fila tolok hasoru. Ne’ebé, ha’u husu labele halo hanesan ne’e, no kuandu ema halo hahalok sira ne’e ba ita, ita kontinua halo buat di’ak hasoru sira. Tanba, Nai Nia evanjellu lahanorin ita atu halo sala hasoru,” Padre Miguel Grilo fó hanoin.

Padre ne’e hateten, dalan santidade no moris hamutuk ho Jesus hanesan santu no santa sira tanba loron 01 fulan-novembru ne’e loron importante tebes tanba konvida sarani sira atu hakbesik ba Jesus liuhosi loron santu no santa sira.

“Ha’u husu ba sarani Laleia oan sira hotu atu halo orasaun ba santu no santa sira hotu-hotu, labele reza de’it ba Nossa Senhora do Rosário ne’ebé nu’udar Mahein ba sarani Laleia tomak,” nia hateten.

Iha misa aukaristia ba loron domingu no Loron Santo no Santa sira nian ne’e, partisipa màsimu hosi sarani Laleia tomak.

Jornalista: Antónia Gusmão

Editór: Cancio Ximenes

HAKEREK NO HATÁN

Please enter your comment!
Please enter your name here