Vítima Domingas Soares, ne’ebé salva ninia oan-feto hosi tentativa violasaun sexuál iha Raikotu, foin lalais ne'e. Imajen/Espesiál

DILI, 31 outubru 2020 (TATOLI)–Sekretáriu Estadu Juventude no Desportu (SEJD), Abrão Saldanha, kondena maka’as aktu krime suspeitu LH hasoru inan (Domingas Soares) no oan (LM) ne’ebé akontese iha aldeia Terra Santa, Raikotu, Dili, sesta (30/10) pur volta 01:10 madrugada.

“Lori Sekretaria Estadu Juventude no Desportu tomak nia naran, ha’u hakarak kondena ho forte tebes, aktu krime hasoru ha’u-nia maluk joven feto ho ninia inan faluk iha sira-nia uma laran rasik,” Sekretáriu Estadu Abrão Saldanha hateten liuhosi nota imprensa  ne’ebé Agência TATOLI asesu iha sábadu ne’e.

Notísia Relevante: Saran-an ba mate, soi oan-feto hosi tentativa violasaun seksuál

Tuir governante ne’e, joven iha papél garante estabilidade, tau matan no kuidadu ba feto sira la’ós hatudu hahalok la edukativu.

“Ita joven sira hotu iha devér boot no presiza halo buat hotu atu garante katak ita-nia inan feton sira sente seguru no bele moris la ho tauk iha sira-nia uma no komunidade,” nia apela.

Biban ne’e, Sekretáriu Estadu ne’e hato’o lamentasaun no sentidu kondolénsia kle’an ba joven feto tamba lakon nia inan doben no apela ba autoridade kompetente hotu atu investiga no hatuur justisa ba vítima sira.

“Apela ba autoridade no entidade kompetente sira hotu, atu tulun ami-nia maluk joven feto ne’e, atu nia bele rekupera husi trauma ne’ebé nia sofre hanesan konsekuénsia husi krime,” nia fó hanoin.

kronolojia krime ne’e, suspeitu LH halo tentativa violasaun sexuál hasoru vítima LM no iha tempu hanesan vítima hakilar husu tulun hafoin suspeitu lori tudik sona joven feto to’o sofre kanek maka’as iha parte liman no kaba’as.

Aleinde ne’e, tanba tauk suspeitu halai no hasoru kedan joven feto ninia inan no LH lori tudik sona iha vítima ninia hirus-matan to’o mate iha fatin.

Jornalista: Hortêncio Sanchez

Editora: Julia Chatarina

HAKEREK NO HATÁN

Please enter your comment!
Please enter your name here