DILI, 30 outubru 2020 (TATOLI)- Ekipa futeból salaun hosi TIC Timor.IP susesu “liki” Grupo Média Nasionál (GMN) ho rezultadu 4-1, iha torneiu Futeból Salaun (Futsal) ne’ebé organiza hosi Ministériu Asuntu Parlamenteres no Komunikasaun Sosiál (MAPKOMS).
Jogu ne’ebé hala’o iha kampu multifunsaun Bebora, Dili, ohin kalan, primeira parte ekipa rua hahú kedan ho kontra no atake, maibé ekipa TIC Timor domina bola hodi halo presaun maka’as ba GMN.
Esforsu ekipa TIC Timor hatudu rezultadu exelente tanba jogadór Joãozinho (88) uza oportunidade bola barullu hodi marka kedan golu dahuluk no konsege muda rezultadu ba 1-0.
Rezultadu ne’e lori esperansa hodi hasa’e liután vontade jogadór TIC Timor nian iha kampu laran, nune’e jogu manas liután maski ekipa GMN kontinua halo presaun, maibé la rezulta golu.
Aproveita oportunidade tuir mai, jogadór TIC Timor Joãozinho (88) hodi lansa tan golu ida, ho rezultadu 2-0.
Score 2-0 la sai kestaun ba GMN hodi ho halo esforsu ne’ebé to’o ikus liuhosi jogadór Moises Soares (11) responde golu ida hodi muda score ba 2-1.
Jogu sai manas liután tanba hetan apoiu hosi adeptu sira, ne’ebé lori sorte di’ak monu duni ba TIC Timor tanba Geovanio (4) hetan oportunidade hodi prodús tan golu, no konsege lori rezultadu hatuur ba 3-1.
Rezultadu dook ona, ekipa TIC Timor kontinua domina bola iha kampu laran hodi halo jogadór GMN “lakon konsentrasaun” to’o la fura rede TIC Timor.
Hosi dominasaun kampu, maka jogadór TIC Timor Fidis R (14) halo tan golu ida hodi lori score sa’e ba 4-1 to’o jogu termina.
Jornalista : Hortencio Sanchez
Editór : Francisco Simões
