TANE Konsimidór lansa portál iha iha Sentru Kulturál Embaixada Portugál, sesta (30/10). Imajen Tatoli/Florêncio Miranda Ximenes

DILI, 30 outubru 2020 (TATOLI)—TANE Konsumidór ofisiálmente lansa portál http://tanekonsumidor.tl/, atu fasilita sidadaun, liuliu konsumidór hatene liután direitu no devér, hato’o keixa bainhira iha violasaun ruma inklui notísia kona-ba atividade asosiasaun advokásia ne’e.

Prezidente TANE Konsumidór, António Ramos da Silva ‘Naikoli’ informa portál ne’e disponível ho lian tetun, portugés no inglés.

“Lansamentu website ne’e atu hakbesik TANE  ba konsumidór sira tanba tuir deliberasaun telekomunikasaun hatudu katak populasaun Timor-Leste, liuliu konsumidór barak mak uza internet,” Prezidente TANE dehan hafoin seremónia lansamentu iha Sentru Kulturál Embaixada Portugál, sesta ne’e.

Tuir António Ramos, meiu ne’e sei fó vantajen boot ba konsumidór iha munisípiu 12 inklui Rejiaun Administrativa Espesiál Oé-cusse Ambeno (RAEOA) liuhosi informasaun nesesáriu inklui fó espasu atu hato’o preokupasaun.

“Portál ne’e loke no simu problema no preokupasaun konsumumidór hodi TANE bele halo mediasaun ho empreza ka insitituisaun Estadu sira,” nia esplika.

Nune’e, asosiasaun advokasia ba konsumidór ne’e garante liuhosi plataforma ne’e bele atende di’ak liután konsumidór sira atu entidade relevante bele hapara viola direitu sira.

Hahú hosi setembru to’o outubru, asosiasaun ne’e rejista ona keixa no informasaun hamutuk 500 no konsege halo mediasaun no rezolve.

Embaixadór Uniaun Europeia (UE) iha Timor-Leste, Andrew Jacobs, rekoñese no valoriza asaun promove seguransa konsumidór sira.

Aleinde ne’e, nia parte defende promove hasa’e koñesimentu direitu no hametin aplikasaun lei no integra iha polítika setorál importante.

“Ami fó parabéns ba ekipa TANE ba konkista lansamentu website tanba importante ba konsumidór timor-oan hodi proteje direitu sosa  sasán no servisu konsumu di’ak liu,” Embaixadór dehan.

Ba atividade proteje direitu no devér konsumidór, UE apoia ona finaseiru €700.000 ba TANE durante períodu tinan-haat.

Nune’e mós, Embaixada Portugal iha Timor-Leste, José Pedro Machado Vieira, apresia servisu TANE no kontinua apoia formasaun atu bele garante no proteje direitu konsumidór sira iha Timor-Leste.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here