Prezidente TANE Konsumidór, António Ramos da Silva ‘Naikoli’. Imajen Tatoli/Antónia Gusmão

DILI, 30 outubru 2020 (TATOLI)–Prezidente TANE Konsumidór, António Ramos da Silva ‘Naikoli’, husu ba Governu atubele regula negósiu online sira tanba simu preokupasaun barak hosi konsumidór.

Nia nota durante ne’e negósiu online fa’an ai-moruk, roupa no seluk tan no dalaruma na’in laiha Timor-Leste maibé utiliza timor-oan halo negósiu no fó lukru boot ba ema iha rai-li’ur.

“TANE foti tema importante hosi portál ne’ebé lansa ona www.tanekonsumidor.tl tanba ita loron-loron simu notifikasaun liuhosi rede sosiál kona-ba negósiu sasán online, tanba ne’e ami konsidera Governu  presiza regula,” Prezidente TANE dehan iha Sentru Kulturál Embaixada Portugal, Dili, sesta ne’e.

Tuir Prezidente asosiasaun ne’e, presiza tau-matan negósiu online tanba laiha garante ba sasán fízikamente la hanesan ho orijinál ne’ebé tau iha rede sosiál.

“Ita sosa buat ruma maibé lahatene produtu ne’e hanesan monta iha imajen ne’e ka lae, liuliu ba aimoruk sira,” ia akresenta.

Ba kestaun ne’e, António Ramos dehan TANE hahú prepara giaun atu diskute ho Governu atu hamosu diploma ka dekretu-lei ida.

Nia konsidera, atu promove protesaun konsumidór, presiza defende direitu tanba Timór seidauk kontrola kestaun ne’e ho di’ak.

“Oportunidade di’ak ba negósiu ida-ne’e maibé TANE serbisu hamutuk ho Governu atubele hasa’e sistema kontrola liuhosi market intelligence. Negósiu legál ne’ebé iha tenke fó serbisu ba ema no selu taxa ba Estadu inklui bele tranamite kapasidade ba timor-oan sira hodi prepara hanesan negósiu na’in,” nia fó hanoin.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here