Xefe Suku Faturilau, Postu Administrativu Lequidoe, Munisípiu Aileu, Albino Amaral. Imajen/Julião “Abekha Raihusar” de Andrade.

LEQUIDOE, 30 outubru 2020 (TATOLI)—Xefe Suku Faturilau, Postu Administrativu Lequidoe, Munisípiu Aileu, Albino Amaral, preokupa tanba Suku Faturilau ne’ebé nia lidera to’o oras-ne’e seidauk asesu eletrisidade, bee-moos no infraestrutura bázika hanesan estrada ne’ebé di’ak atu tulun populasaun transporta sira-nia produtu lokál hodi bele asesu ba merkadu.

Notísia Relevante: Produtu lokál Suku Faturilau mak Bani-been

“Eletrisidade sai preokupasaun bo’ot. Servisu administrasaun to’o agora iha sede suku buat hotu manual no ita hakerek ho liman de’it tanba mákina mós laiha. Deklarasaun ruma atu responde urjente susar tebes,” Xefe Suku Albino Amaral hato’o ba jornalista sira iha nia knaar fatin iha Lequidoe, foin lalais ne’e.

Nia haktuir, tanba la asesu ba eletrisidade entaun dokumentu importante suku nian ne’e hotu-hotu tenke ba iha Aileu-vila mak foin halo kopia ka imprime. Tanba, tuir nia, buat hotu tenke ba rentál ho nia distánsia dook mak bele prodús netik deklarasaun ruma, entaun bainhira komunidade presiza urjente mós tenke hein to’o semana ida.

Alende ne’e, nia hateten, la’os de’it la asesu eletrisidade maibé iha sukur refere, komunidade mós enfrenta problema bee-moos liuliu edifísiu estadu nian hanesan haris fatin, eskola, no sentru saúde mós bee-moos laiha.

Nia mós preokupa ba infra-estrutura bázika hanesan estrada tanba ligasaun hosi suku ne’e ba Aileu-vila, to’o agora niia kondisaun aat hodi difikulta komunidade atu transporta sira-nia produtu lokál ba faan iha merkadu lokál ka nasionál.

“Kona-ba estrada públiku, dala ruma tinan 10 ka 20 ona mak ha’u garganta paralon hela to’o garganta maran no bele mate tan iha fatin mós nafatin hela de’it. Di’ak liu ha’u nonook tiha tanba ha’u laiha ona kompeténsia,” Xefe Suku ne’e halerik.

Maibé autoridade lokál ne’e apresia ho nia komunidade ne’ebé iha komitmentu makaas atu faan sira-nia produtu lokál, maske susar atu asesu ba estrada maibé sira nafatin hala’o knaar hanesan agrikultór hodi hodi kuda modo no seluk tan.

“Komunidade iha korajen makaas, atu hatutan sira-nia moris ne’e liuhosi vida agrikultura maske estrada la di’ak no oinsá mak sira bele asesu ba merkadu,” nia dehan.

Entretantu, komunidade Lúcia Amaral husu ba Governu atu tau atensaun ba infra-estrutura bázika iha Orsamentu Jerál Estdu (OJE) 2021.

“Ami la husu buat di’ak maibé ami husu mak eletresidade, bee-moos, estrada, edukasaun no saúde,” nia husu.

Kona-ba preokupasaun hirak ne’e, Administradór Postu Administrativu Lequidoe, Domingos Damião  hateten, kestaun infra-estrutura presiza xefe suku sira-nia planu, depois hato’o ba administradór postu administrative mak foin submete ba munisípiu, atu nune’e halo prosesu ba planu ne’e.

“Problema maka ne’e, bainhira planu sira ne’e ita foti husi suku mai, depois mai iha postu tais fali atu foti saida mak prioridade iha suku. Tanba ne’e, presiza planu hosi suku nune’e labele mosu planu dubru. Tanba, ita hakarak buat ne’ebé laiha ita foti mak ida-ne’e,” nia hateten.

Tuir sensu populasaun tinan 2015, suku Faturilau ho nia aldeia rua mak hanesan Cairema no Lebumeran  ne’ebé iha populasaun hamutuk 719, ho nia área 77,60 km².

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here