Ministru Prezidénsia Konsellu Ministru, Fidelis Manuel Leite Mangalhães, fó posse ba Prezidente no Membru Conselho Administrasaun Centro Nacional Chega! (CNC). Imajen TATOLI/Osória Marques.

DILI, 30 outubru 2020 (TATOLI)–Centro Nacional Chega! (CNC), ohin, selebra aniversáriu tinan 15 Comissão Acolhimento, Verdade e Reconciliação (CAVR) entrega relatóriu “Chega!” ba Prezidente Repúblika Xanana Gusmão iha Salaun Nobre Lahane, Dili, iha 31 outubru 2005.  

Serimónia ne’e hahú ho diskusaun nakloke ba relatóriu CAVR “Chega!” ho tema “Chega! Tinan XV: Hametin no Hatutan Memória Pasada” no fó tomada de posse ba Prezidente no Membru Conselho Adminsitrasaun Centro Nacional Chega! (CNC) ba períodu 2020-2023 iha Antigu Komarka, Balide, Dili.

Hafoin simu tomada de posse, Prezidente Conselho Administrasaun Centro Nacional Chega (CA-CNC), Alzira dos Reis, hateten nia kompremitidu atu kontribui ninia kapasidade durante ninia mandatu hamutuk ho estrutura Conselho Administrasaun CNC nian seluk.

“Ha’u kompromitidu tebes atu kontribui ho másimu tuir ha’u-nia kapasidade ne’ebé mak iha no servisu hamutuk ho membru Konsellu Administrasaun tomak CNC nian. Tanba, ha’u fiar katak ami bele sai ekipa ne’ebé mak forte hodi korntribui no mellora servisu advokásia, edukasaun ba implementasaun rekomendasaun relatóriu CAVR “Chega!” hodi fó apoia subrevivente sira iha Timor-Leste,” Pezidente CNC, Alzira dos Reis, hato’o nia intervensaun hafoin simu posse hosi Ministru Prezidénsia Konsellu Ministru, Fidelis Manuel Leite Mangalhães, sesta ne’e.

Nia hateten, iha mandatu estrutura Conselho Admiistrasaun CNC nian ba tinan tolu (3) nia-laran ho papél xave mak hanesan superviziona atividade CNC nian no asegura ninia implementasaun sira, tuir polítika no kompeténsia CNC nian no aprova regulamentu organizasaun nian no planu estratéjiku, planu anuál orsamentu, aprovirinamentu no aprova relatóriu evolusaun ezekusaun hosi planu ne’ebé mak temi ona.

Pezidente Conselho Administrasaun CNC, Alzira dos Reis, hamriik haree Ministru Prezidénsia Konsellu Ministru, Fidelis Manuel Leite Mangalhães, asina termu de posse. Imajen TATOLI/Osória Marques.

“Ami-nia promesa no kompromísu no ho nia objetivu mak atu hatene oinsá ami-nia kompromísiu hodi ba haforsa servisu CNC nian durante tinan tolu nia-laran. CNC konsidera nu’udar ajénsia autonómia administrativa no finanseira ho reseita própria maibé nota katak projesaun reseita ba 2021 seidauk eziste. Tanba ne’e, ami hotu sei tau esforsu hamutuk hodi prodús planu emprezariál bele kolleta reseita CNC nian iha future,” nia hateten.

Nia iha konfiansa no fiar katak ekipa ne’ebé forte, kualifikadu, talentoza no dedikasaun makaas no sei kontinua serbí membru alvu sira ho padraun profesíonalizmu no integridade ne’ebé aas.

“Hamutuk ita realiza CNC nia vizaun ba sosiadade ida ne’ebé mak inkluziva, la repete istória pasadaa nian, moris iha dame no respeitu direitu umanu,” nia dehan.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here