Komandante PNTL Munisípiu Aileu, Superintendente Polísia, Jorge Monteiro. Imajen TATOLI/Osória Marques.

AILEU, 30 outubru 2020 (TATOLI)—Komandante Polísia Nasionál Timor Leste (PNTL) Munisípiu Aileu, Superintedente Polísia, Jorge Monteiro, informa liuhosi atividade operasaun ka “check point” ne’ebé hala’o iha Munisípiu Aileiu hahú hosi janeiru to’o outubru 2020, PNTL Aileu hatama reseita ba kofre Estadu ba períodu lima hamutuk $8.550.

Notisia Relevante: PNTL Aileu la autoriza sidadaun konsumu alkol iha semitériu

“Relasiona ho atividade operasaun ka ceck point ne’ebé hala’o hosi janeiru to’o outubru 2020, PNTL Munisípiu Aileu hatama reseita ba kofre Esatdu hamutuk $8.550,” Superitendente Polísia, Jorge Monteiro, informa ba jornalista sira iha nia knaar fatin PNTL Aileu, foin lalais ne’e.

Entretantu, komandante ne’e haktuir hosi janeiru to’o outubru tinan ida-ne’e, Polísia Nasionál Timor Leste (PNTL) Munisípiu Aileu rejista kazu krime enjerál hamutuk 104.

Hosi kazu 104 ne’e, nia dehan, númeru ne’ebé makaas liu mak kazu ofensa integridade fízika, tuir mai mak kazu espozisaun no abandonadu, kazu abuzu konfiansa danu-simples, danu agravadu ameasa, violasaun seksuál no esplorasaun seksuál.

“Ita rejista kazu krime ne’ebé mak akontese iha Munisípiu Aileu hamutuk 104 no aas liu mak kazu ofensa integridade fízika,” nia hateten.

Kona-ba asidente tráfiku, nia hatutan, asidente tráfiku ne’ebé mak akontese iha Aileu hahú husi janeiru to’o outubru tinan ne’e hamutuk 67 ne’ebé kompostu hosi asidente 47 no insidente 20.

Nia dehan, asidente ne’e sempre involve objetu rua mak motór ho motor xoke malu, kareta ho motór ka kareta ho kareta mak xoke malu no kona-ba insidente mak ema monu mesak ho motór ka kareta ruma no dala ruma mós monu hosi ai-leten.

“Kona-ba insidente ne’ebé rezulta ita-nia komunidade sai vítima mate hanesan monu iha rai naruk, sa’e tua mak monu, sa’e ai hodi ku’u malus mak monu, ita rejista hamutuk ema na’in-neen (6),” nia hateten.

Nia dehan, kazu seluk mak kona-ba kazu disputa rai ka hadau malu rai ne’ebé sempre hamosu problema mak hanesan disputa plantasaun sira hanesan plantasaun kafé no plantasaun to’os.

Aleinde ida ne’e, Komandante Jorge Monteiro informa katak PNTL Aileu mós rejista kazu tara-aan ne’ebé akontese iha Munisípiu Aileu mak hamutuk kazu 11 mak kompostu hosi feto na’i-rua (2) no mane na’in-sia (9) mak tara-aan.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here