VIII Governu Konstitusionál ho entidade relevante realiza retiru iha auditóriu fakuldade engeñaria UNTL, Politéknika Hera, sesta (30/10). Imajen Tatoli/Egas Cristovão

DILI, 30 outubru 2020 (TATOLI)VIII Governu Konstitusionál realiza retiru dalimak hodi membru Governu sira bele iha ona informasaun molok debate proposta Orsamentu Jerál Estadu (OJE) tinan fiskál 2021 iha Parlamentu Nasionál (PN).

Ministru Prezidénsia Konsellu Ministru, Fidelis Manuel Leite Magalhães, hateten retiru ne’e ba dalimak ona tanba antes ne’e realiza ona retiru hafoin ezisténsia VIII Governu Konstitusionál.

“Retiru ne’e Governu konvida entidade sira atu fahe hanoin no informasaun, inklui bolu espesialista hodi fahe informasaun, nune’e membru Governu sira bele prepara-an liután durante mandatu Governu no eventu importante hanesan debate orsamentu,” Ministru Fidelis relata hafoin retiru iha auditóriu fakuldade engeñaria Universidade Nacionál Timor Lorosa’e (UNTL), Politéknika Hera, munisípiu Dili, sesta ne’e.

Durante sesaun, konta mós ho prezensa líder polítiku ne’ebé apoiu plataforma ne’e.

“Konvida sira iha seremónia ne’e atubele divulga informasaun no orienta polítikamente lala’ok nasaun no governasaun nian, ho ida-ne’e mak marka prezensa Sekretáriu Jerál partidu FRETILIN no koordenadór ba plataforma, Marí Alkatiri, Konselleru másimu KHUNTO, José dos Santos Naimori Bucar no Primeiru-Ministru, Taur Matan Ruak, aleinde nu’udar uma-nain reprezenta mós partidu nian,” nia informa.

Iha parte dadeer iha intervensaun no rona aprezentasaun hosi Unidade Planeamentu, Monitorizasaun no Avaliasaun (UMPA) kona-ba orsamentu bazeia ba programa inklui aprezentasaun hosi Ministériu Finansa kona-ba Lei OJE 2021.

Nune’e mós, Vise Primeiru-Ministru no Ministru Planu no Ordenamentu, José Maria dos Reis aprezenta fundu infraestrutura no funsionamentu ajénsia sira iha ministériu foun ne’e no esforsu Governu hadi’a implementasaun setór infraestrutura.

Hafoin rona aprezentasaun, deputadu sira halo pergunta kona-ba orsamentu bazeia ba programa no mós troka hanoin ho membru Governu sira kona-ba entendimentu modelu dezenvolvimentu durante mandatu VIII Governu  no iha futuru.

Konkluzaun hosi retiru ne’e maka partilla informasaun no iha kompromisu ne’ebé boot atu asegura katak modelu OJE ne’ebé Governu aplika sei di’ak no asegura liu prestasaun husi parte Governu no fasilita PN hanesan fiskalizadór hodi ajuda ezekutivu sira implementa di’ak liután programa sira.

Iha retiru ne’e, Governu konvida Prezidente Parlamentu Nasionál inklui bankada Governu iha plataforma polítika kompostu hosi partidu FRETILIN, KHUNTO no PLP.

Konvida mós bankada opozisaun PD, FM no PUDD hanesan observadór.

Retiru ne’e hahú tuku 09:00 dadeer to’o tuku 18:00 liu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here