Logotipu JSMP

DILI, 30 outubru 2020 (TATOLI)- Organizasaun Naun Governamentál hosi Programa Monitorizasaun Sistema Judisiál (JSMP-sigla inglés), foin lalais ne’e, realiza formasaun  kona-ba demokrasia, knaar órgaun soberanu sira nian, partisipasaun públiku iha prosesu halo lei no asesu ba justisa formal  ba estrutura Suku Sagadate, Postu Administrativu Laga, Munisípiu Baucau.

Notísia Relevante : Implementa lei protesaun ba testemuña, JSMP prefere kria kondisaun adekuadu

Partisipante hosi treinamentu ne’e kompostu husi xefe aldeia, pesoál apoiu suku (PAS), lia-na’in suku no xefe suku rasik ho totál partisipante hamutuk ema na’in-15 ne’ebé mai hosi Aldeia Abuti, Selegua, Samagata, Ia Sula, One Bu’u, Serebui, Ulakuti no Be Liawali.

Objetivu hosi treinamentu ne’e mak habelar informasaun no hasa’e koñesimentu membru estrutura suku sira kona-ba demokrasia, knaar órgaun soberanu sira nian, partisipasaun públiku iha prosesu halo lei no asesu ba justisa formál.

Diretóra JSMP, Ana Paula Marçal. Imajen Tatoli/Dok

“Treinamentu kona-ba asuntu demokrasia no justisa formál ba iha estrutura suku sira importante tebes tanba liuhosi treinamentu ka formasaun sira hanesan ne’e bele hasa’e sira-nia koñesimentu, nune’e sira bele hala’o sira nia kna’ar ho di’ak liután,’’ Diretora Ezekutiva JSMP, Ana Paula Marçal, hateten liuhosi nota komunikadu JMSP nian ne’ebé Agência Tatoli asesu, ohin.

Iha sesaun kona-ba demokrasia, kestaun prinsipál sira ne’ebé partisipante sira foti mak relasiona ho liberdade iha Estadu direitu demokrátiku no idade menus hosi tinan 17 la iha direitu polítiku atu tuir eleisaun maske demokrasia fó liberdade ba ema hotu-hotu.

Notísia Relevante : JSMP fó formasaun asesu justisa formal ba komunidade Laclo

Hatán ba preokupasaun ne’e, JSMP esplika kona-ba espasu, liberdade no limitasaun direitu sira ne’ebé konsagra ona iha konstituisaun no lei sira.

Kona-ba idade, JSMP esplika katak konstituisaun no lei sira atribui direitu ne’e ba sidadaun sira ne’ebé atinje ona idade adultu ne’ebé iha ona kapasidade atu bele hili.

Iha sesaun daruak kona-ba asesu ba justisa formál, partisipante sira preokupa ho seguransa ba sira nia-an bainhira sira hato’o keixa tanba sira sempre hetan ameasa hosi suspeitu sira to’o baku-malu no oho-malu.

Hatán ba ida ne’e, JSMP rekoñese katak preokupasaun ba situasaun ida-ne’e akontese iha fatin hotu, nune’e Governu liuhosi instituisaun polísia harii ona Unidade Ofisiál Polísia Suku (OPS) hodi prevene no rezolve krime sira hanesan ne’e.

Aleinde ne’e, bainhira hetan ameasa, JSMP sujere halo keixa ba polísia tanba ameasa ne’e nu’udar krime ida.

Xefe Suku Sagadate, Aureliano de Jesus, iha ninia abertura no mós enserramentu ba treinamentu ne’e agradese ba JSMP ne’ebé fasilita ona treinamentu importante ne’e, no liuhosi treinamentu ne’e, aumenta sira-nia koñesimentu kona-ba demokrasia no sistema justisa formál nian.

Treinamentu ne’e realiza tanba hetan apoiu finanseiru hosi Governu liuhosi Gabinete Apoiu Fundu Sosiedade Sivíl.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here