Ekipa futeból salaun (futsal) feminina hosi Telkomcel ho MAPKOMS. Imajen/Espesiál

DILI, 30 outubru 2020 (TATOLI) – Ekipa futeból salaun (futsal) feminina hosi  Telkomcel “tidin” ekipa Ministériu Asuntu Parlamenteres no Komunikasaun Sosiál (MAPKOMS) ho golu 3-1.

Liuhosi torneiu futsal MAPKOMS 2020, iha  salaun multifunsaun Bebora, Dili, ohin kalan, ekipa rua hahú  lansa kedan kontra atake ho tékniku no abilidade ida-idak nian.

Kontra atake hirak ne’e la saugati ba ekipa MAPKOMS, tanba jogadora Joaquina (17) uza kedan oportunidade livre hodi prodús golu primeiru hodi lori rezultadu 1-0.

Hosi golu ne’e halo ekipa rua nia ritmu jogu manas liután, maibé to’o minutu primeira parte termina laiha tan golu ruma ne’ebé prodús hosi jogadora ekipa rua. Ho nune’e. rezultadu provizóriu MAPKOMS mak lidera 1-0.

Bainhira hakat ba segunda parte, ekipa Telkomcel halo presaun maka’as ba MAPKOMS, hodi halo jogu manas liután, no bola barullu iha guarda rede MAPKOMS, ikus mai Jogadora Maria Elisabeth (12) uza kedan oportunidade hodi fura rede MAPKOMS no lori score ba 1-1.

Hosi golu primeiru Telkomcel nian ne’e halo ekipa MAPKOMS sente “nakdoko” hodi fó tan oportunidade ba jogadora Telkomcel Griceria (11) prodús tan golu ida hodi lori rezultadu ba 2-1.

Golu ne’e hanesan grasa ne’ebé “siga ka tonka” espíritu jogadora Telkomcel sira nian. Nune’e jogadora Telkomcel Luisa (10) marka tan golu ikus hodi hatuur score sai 3-1.

Golu ba datoluk Telkomcel nian  ne’e hanesan golu ikus iha jogu entre ekipa rua tanba to’o minutu remata árbitru huu naruk hodi termina jogu, laiha tan golu ruma mak akontese. Nune’e vitória monu ba Telkomcel no MAPKOMS obrigadu tenke derrota.

Jornalista   : Hortencio Sanchez

Editór        : Francisco Simões

 

HAKEREK NO HATÁN

Please enter your comment!
Please enter your name here