AJORSTIL hato'o petisaun ba FFTL relasiona ho aktu ofisiál FFTL nian, Zelagio da Silva hasoru jornalista iha kopa FFTL, foin lalais ne'e. Imajen/Espesiál

DILI, 29 outubru 2020 (TATOLI) – Asosiasaun Jornalista Desportu Timor – Leste (AJORSTIL), ohin,  hato’o petisaun ba Federasaun Futeból Timor – Leste (FFTL) relasiona ho aktu  ofisiál  FFTL nian, Zelagio da Silva, ne’ebé hakilar jornalista iha jogu finál  kopa FFTL, foin lalais, iha Estádiu Café Gleno, Ermera.

Zelagio da Silva ne’ebé asume nu’udar “match commissioner” iha jogu final kopa FFTL ne’e, hatudu hahalok bele dehan, “arrogante” hodi hakilar no hatudu liman ba jornalista sira bainhira jornalista sira halo kobertura ba final kopa FFTL iha Estádiu Café Gleno, foin lalais ne’e. Imajen/RTTL

Zelagio da Silva ne’ebé  asume nu’udar “match commissioner” iha jogu final kopa FFTL ne’e, hatudu hahalok bele dehan, “arrogante” hodi hakilar no hatudu liman ba jornalista sira bainhira halo kobertura ba eventu ne’e.

AJORSTIL deside hato’o karta petisaun ba FFTL ho objetivu atu haree no foti medida sériu hasoru Zelagio da Silva, atu evita la bele akontese tan aktu “arrogante” ne’ebé la kontribui ba armonia entre jornalista ho komisaun organizadora kopa FFTL nian iha futuru.

Prezidente AJORSTIL, Evangelisto Gantry dos Santos Meilana hateten, karta ne’ebé halo atu husu ba lideransa másimu FFTL atu fó xamada ba aktu ne’ebé membru ne’e halo.

“Ohin ami Jornalista desportu Timor – Leste mai iha ne’e atu fó karta petisaun ida ba lideransa másimu FFTL hodi bele fó atensaun ba membru ne’ebé hala’o asaun no hasai lian maka’as ba jornalista Vitor Madeira iha finál kopa FFTL foin lalais iha Gleno. Karta ne’e mós husu ba membru ne’e atu labele komete tan hahalok nune’e iha futuru,” Gantry hateten liuhosi konferénsia imprensa iha sede FFTL, Formosa Dili.

Nia dehan, ba futuru atu labele mosu tan problema hirak hanesan ne’e, FFTL tenke prepara fatin ka kondisaun sufisiente ba jornalista sira hodi halo kobertura.

“Iha karta ne’e mós ami husu ba FFTL atu haree no ba oin tenke prepara fatin própriu ba Jornalista sira,  nune’e fasilita jornalista sira bele halo kobertura ho di’ak no dignu. Jornalista nia fatin labele kahur fali ho adeptu sira ka seguransa sira, nune’e bele halo servisu ho livremente,” nia hateten.

Iha fatin hanesan Sekretáriu Jerál FFTL, Nelio Isaac Sarmento hateten, agradese ba AJORSTIL ne’ebé iha hanoin di’ak hodi  kontribui halo remata tiha problema ne’ebé mosu iha Gleno entre membru FFTL Zelagio ho Jornalista RTTL Vitor Madeira.

“Agradese ba imi hotu ne’ebé hanoin di’ak atu halo remata tiha problema ne’e. Ha’u hanesan Sekretáriu Jerál FFTL konsidera hanesan problema ki’ikoan ida tanba iha situasaun apertadu ita sempre lori emosaun hodi hasoru malu, maibé loloos ne’e se ita ko’alia ba malu ho didi’ak ita sei hetan solusaun di’ak,” Nelio hateten.

“Karta ne’e ami simu ona, hanoin ami FFTL laiha ona problema ho Jornalista hotu, dala ida tan lori FFTL nia naran agradese no husu deskulpa ba Jornalista hotu hamutuk ita lori futeból ba oin,” Nelio afirma tan.

Zelagio da Silva mós uza oportunidade ne’e hodi husu deskulpa ba Jornalista no públiku hotu ba hahalok ne’ebé nia komete hasoru Jornalista ho lian maka’as ne’ebé la kontrola.

“Iha fatin ida ne’e ha’u hakarak husu ba kolega Jornalista sira deskulpa, ha’u mós hakarak hato’o katak iha jogu kopa FFTL ha’u nia pozisaun la’ós hanesan diretór kompetisaun, maibé hanesan “Match commissioner”. Entaun fatin Estádiu hotu ha’u mak manda no kontrola. Maibé ba oin ita sei hadi’a fallansu sira hanesan ne’e,” Zelagio da Silva hateten.

Jornalista   : Hortencio Sanchez

Editór        : Francisco Simões

 

HAKEREK NO HATÁN

Please enter your comment!
Please enter your name here