Prezidente Repúblika, Francisco Guterres "Lú- Olo". Imajen Tatoli/ António Gonçalves

DILI, 29 outubru 2020 (TATOLI) –Prezidente Repúblika (PR), Francisco Guterres “Lú-Olo”, iha loron 27 outubru, foin lalais ne’e,  promulga Dekretu-Lei kona-ba harii Fundu Rezerva Seguransa Sosiál.

Notísia Relevante : Prezidente Repúblika promulga dekretu-lei apoiu planu rekuperasaun ekonómika

Nota komunikadu imprensa ne’ebé Agência Tatoli asesu, ohin, hosi Prezidénsia Pepúblika kontempla, Dekretu-Lei promulga iha ona iha loron 27 fulan outubru hosi Prezidente Repúblika permite harii ona Fundu Rezerva ba Seguransa Sosiál hodi rai osan-restu (balansu), hafoin selu subsídiu no pensaun sira kontempla iha rejime ne’e.

Fundu Rezerva  ne’e hala’o ho modelu jestaun ida ne’ebé  loke dalan atu haburas sistema seguransa sosiál ida ho sustentabilidade finanseira no sosiál.

Jestór sira ba Fundu ne’e sei halo esforsu atu  jere osan iha “karteira” boot ne’e ho risku ki’ik no hetan funan boot.

Timor-Leste hili Rejime Seguransa Sosiál ida ne’ebé traballadór no entidade empregadór hothotu kontribui ba;  selu subsídiu ba sira ne’ebé labele ona serbisu / jerasaun hanesan no selu pensaun ba traballadór jerasaun uluk nian.

Hafoin selu benefísiu no pensaun sira ne’e hotu, osan-restu sei transfere ba Fundu Rezerva  ne’e atu halo funan babeibeik hodi aban-bairua bele kontinua selu subsídiu no  pensaun ba kontribuinte sira.

To’o dezembru 2020, Institutu Seguransa Sosiál prevee  katak Fundu Rezerva ne’e sei iha kapitál inisiál ho montante totál  dollar amerikanu millaun sia nulu resin.

Entidade emprega traballadór mak iha devér atu ko’a  kedas osan fulan-fulan hosi traballadór nia saláriu  ka rendimentu hodi hatama iha Fundu Rezerva.

Entidade públika independente ida mak sei halo jestaun ba Fundu Rezerva ne’e.

Ministériu Solidariedade Sosiál no Inkluzaun (MSSI), nu’udár órgaun tutela, iha obrigasaun atu tau matan ba Institutu Seguransa Sosiál no Fundu Rezerva Seguransa Sosiál ninia lala’ok,  atu hametin konfiansa traballadór sira-nian no entidade patronal sira-nian  ba sistema foun ne’e.

Osan ne’ebé ko’a to’o agora tama hela iha konta bankária espesiál ida ba rejime kontributivu ne’e, rai  iha Banku Sentrál Timor-Leste.

Lei refere ba Rejime Kontributivu ba Seguransa Sosiál iha Timor-Leste aprova iha 2016, maibé Dekretu-Lei sira ne’ebé  regula obrigasaun  pagamentu no benefísiu tuir lei haruka,  promulga de’it iha 24 maiu 2017.

Ba entidade públika sira, rejime ne’e hahú implementa de’it iha outubru 2017, maibé ba fulan outubru, novembru no dezembru no désimu terseiru més tinan 2017, Governu mak selu kontribuisaun tomak, hosi  traballadór ida-idak (4% hosi baze insidénsia)   no hosi entidade públika ( 6% hosi baze insidénsia).  Signifika katak, osan ko’a hosi kada traballadór entidade públika nian ba rejime kontributivu hahú de’it hosi janeiru 2018, maibé, sura hamutuk hosi outubru 2017, traballadór ida-idak hosi entidade públika kontribui ona fulan-36 ba seguransa sosiál.

Jornalista        : Cipriano Colo

Editór              : Francisco Simões

HAKEREK NO HATÁN

Please enter your comment!
Please enter your name here