Sekretária Jerál Parlamentu Parlamentu Nasionál, Cedelizia Faria dos Santos, hala'o abertura formasaun ba jornalista destakadu sira. Imajen TATOLI/Evaristo Soares Martins.

DILI, 29 outubru 2020 (TATOLI)—Sekretariadu Parlamentu Nasionál oferese formasaun kona-ba prosesu lejizlativa komún no prosesu lejizlativa espesiál ba jornalista destakadu sira nune’e hasa’e koñesimentu iha kualkér atividade parlamentár.

Formasaun ne’e liuhosi jornada semináriu ne’ebé oferese hosi Parlamentu Nasionál durante loron rua, kinta (29/10/2020) no sesta (30/10/2020). Iha loron dahuluk oferese formasaun kona-ba prosesu lejizlativa komún no lejizlativa espesiál, ne’ebé oferese hosi formadór Paulo da Costa Nunes.

Jornalista destakadu hamutuk 23 ne’ebé partisipa iha formasaun ne’e mai hosi mídia eletrónika, online no imprime kompostu hosi STL, RTTL,E.P, Timor Post, GMV-TV, INDEPENDENTE, Bussiness Timor, RTM, Agência TATOLI,I.P, TVE, G-RTV, Naunil, The Oekusi Post, Lafaek News, Naunil no Loluwari, ne’ebé loke hosi Sekretária Jerál Parlamentu Nasionál Cedelizia Faria dos Santos.

“Ita halo formasaun durante loron rua ne’e kona-ba prosesu lejizlativa komún no lejizlativa espesialidade nune’e jornalista sira bele koñese didi’ak atividade parlamentár. Jornalista balu kleur ona maibé balu foun entaun presiza iha koñesementu servisu parlamentár nian,” Cedelizia Faria dos Santos ko’alia bainhira hala’o abertura ba jornada semináriu ne’e iha salaun GMPTL, Parlamentu Nasionál, kinta ne’e.

Sekertária Jerál PN ne’e espera formasaun ne’e bele loke koñesementu jornalista destakadu iha uma fukun.

“Ha’u espera iha loron últimu ita-boot sira bele fó sujestaun ba parlamentu. Ami simu ita-boot sira-nia sujestaun, fatin iha parlamentu ne’e limitadu. Ho situasaun COVID-19 ami haruka balun mak tama no balun latama, la’ós halo diskriminasaun maibé ita-nia situasaun iha parlamentu mak nune’e,” nia dehan.

Sekretária Jerál ne’e dehan, bainhira uma mídia komunikasaun konklui iha fulan rua oin mai sei fó espasu ba jornalista hala’o funsaun kobertura ho di’ak.

Formadór Paulo da Costa Nunes aprezenta matéria prosesu lejizlativa komún no prosesu lejizlativa espesiál. Imajen TATOLI/ Evaristo Soares Martins.

Formadór Paulo da Costa Nunes oferese matéria prosesu lejizlativa komún mak hanesan podér ba inisiativa, inisiativa nia forma sira, limitasaun simu projetu-lei no proposta lei, limite espesiál ba inisiativa, hafoun hikas inisiativa, admisaun no kanselamentu ba inisiativa, ezerse inisiativa lejizlativa, prosesu urjénsia sira, rekizitu formál sira ba projetu-lei (PN) no proposta-lei (Ezekutivu) to’o vetu tanba inkonstitusionalidade.

Nune’e mós formadór Paulo da Costa Nunes lori mós matéria prosesu lejizlativa espesiál (espesializada) mak hanesan parlamentu nia reuniaun sira, debate sira, votasaun no forma autorizasaun no materia atvidade parlamentár sira seluk ne’ebé hakerek ona Rejimentu Parlamentu Nasionál.

Tuir observasaun Agência TATOLI durante formasaun dahuluk nota jornalista destakadu husu pergunta barak kona-ba prosesu lejizlativa komún no prosesu lejizlativa espesiál.

Jornalista STL Guilhermina Franco, husu ho pergunta “tanbasá mak OJE 2020 retiradu no xumbadu iha Parlamentu Nasionál maibé Governu kontinua aprezenta proposta-lei OJE 2020 ne’e?”

Hatán ba pergunta ne’e, formadór Paulo da Costa Nunes, esplika sesaun lejizlativa dura tinan ida, hahú hosi 15 setembru 14 setembru iha tinan tuir mai.

“Períodu normál funsionamentu Parlamentu Nasionál hahú iha 15 setembru no remata iha 15 jullu. Ne’e ha’u hatán de’it saida mak hakerek iha rejimentu, kona-ba polítika ha’u labele hatán tanba ha’u laiha kompeténsia ba ida-ne’e,” nia hateten.

Entretantu iha loron daruak (aban), Konsellu Imprensa (CI-sigla portugés) sei oferese formasaun kona-ba peace journalism.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here