Prezidente Conselho de Imprensa, Virgilio Guterres. Foto Tatoli

DILI, 29 outubru 2020 (TATOLI)—Prezidente Conselho de Imprensa, Virgílio da Silva Guterres “Lamukan”, apoia projetu-rezolusaun hosi Deputadu Mariano Assanami Sabino tanba ativista pro-demokrásia Indonézia no pró-independénsia Timor-Leste Nugroho Katjasungkana merese sai sidadaun Timor.

Notísia Relevante: Assanami propoin projetu rezolusaun rekoñese Nugroho Katjasungkana sai sidadaun Timorense

“Ha’u hanoin projetu rezolusaun ne’ebé parlamentu atu diskute no aprova ne’e merese tanba ne’e Estadu Timor-Leste iha obrigasaun atu rekoñese sidadaun rai seluk ne’ebé ke fó sira-nia aan tomak, fó sira-nia laran tomak hodi apoia luta libertasaun nasionál. Ita Timor laiha buat seluk folin liu atu selu ema sira-ne’e nia sakrifísiu,” Virgílio da Silva Guterres, amigu Katjasungkana ne’e informa ba Agência TATOLI liuhosi telemovel, kinta ne’e.

Prezidente Conselho de Imprensa Timor-Leste ne’e apoia totalmente projetu-rezolusaun ne’e, nune’e sai timorense no Estadu iha obrigasaun tulun ativitista ne’ebé oras-ne’e moras hela.

Virgílio da Silva Guterres haktuir, Nugroho hanesan fundadór Forum Solidaritas Timor Lorosa’e (FORTILOS) iha tinan 1994-1995, ne’ebé apoia makaas luta indepedenénsia Timor-Leste nian iha situasaun defísil.

Nia dehan, Nugroho hola parte luta ba independénsia Timor-Leste nian no mós envolve harii Sahe Study Group (SSG) iha tinan 1996.

Eis prizioneiru polítiku ne’e mós lembra, iha períodu ba kampaña referendu, Nugrho mai Timor-Leste hodi halo kooperasaun ho Yayasan Hak (Asosiasaun Hak) hodi ajuda halo kampaña no halo análize konseitu sira kontra pro-autonomia.

“Iha tempu ne’ebá milísia duni sira sai hosi Farol, referendu tiha, nia sei mai fali hamutuk iha Asosiasaun Hak responsabiliza hanesan públikasaun diretu hamutuk ho Rui Viana,” nia haktuir.

Nune’e mós Nugroho hola parte iha Institutu Edukasaun Populár hodi halo formasaun ba ativista timoroan sira haleu munisípiu sira.

“Nugroho ho nia espoza Titi Irawati Supardi uluk jornalista koñese malu liuhosi ativizmu. Nia espoza envolve mós FORTILOS, Sahe Study Club, Asosiasaun Hak. Sira na’in-rua deside hela iha Timor, ba Indonézia hanesan vizita de’it. Ikus mai, sira na’in-rua hola-rai iha Markoni hodi hela permanente to’o agora,” nia dehan.

Nugroho Katjasungkana ho nia espoza hanesan mós membru Asosiasaun Jornalista Timor Leste (AJTL) no simu ona kondekorasaun iha tinan 2017 ho medalla orden Timor.

“Ha’u bele dehan Nugroho ho nia espoza kompara ho ativista sira seluk maibé nia estraordinária (luar biasa) tanba Timor ukun-aan ona maibe deside hela iha Timor tanba sira na’in-rua nia empeñamentu luta ba ukun aan ninian inklui sira na’in-rua nia relasaun ho ativista timoroan. Hanesan ami sira-ne’e, sente hanesan família,” Prezidente CI-TL ne’e hateten.

Lamukan konsidera, ativista ne’e dehan espíritu luta ba libertasaun nasionál defende saudozu Sahe nia hakarak, tanba ne’e nia la’ós de’it hadomi luta maibé hadomi mós rai Timor.

Jornalista: Evaristo Soares Martins

Editór: Cancio Ximenes      

HAKEREK NO HATÁN

Please enter your comment!
Please enter your name here