Reuniaun Konsellu Jestaun Fundu COVID-19 iha salaun Ministériu Finansa, kinta (29/10). Imajen/Mídia MF

DILI, 29 outubru 2020 (TATOLI)–Konsellu fundu COVID-19 realiza sorumutuk hodi atualiza progresu ezekusaun no halo aprovasaun ba programa no sub-programa Ministériu Koordenadór Asuntu Ekonómiku (MKAE).

Reuniaun ne’e prezide hosi Prezidente Konsellu Jestaun Fundu COVID-19, Sara Lobo Brites, ne’ebé hala’o iha salaun auditóriu Ministériu Finansa, Aitarak-laran.

“Objetivu hosi reuniaun ne’e atu hetan atualizasaun hosi Sekretariadu Tékniku kona-ba progresu ezekusaun fundu to’o loron 28 outubru 2020, halo aprovasaun lista pagamentu, aprovasaun programa no sub-programa hosi MKAE inklui aprovasaun planu ezekusaun iha fundu COVID-19,” hateten Sara Lobo, liuhosi nota ofisiál ne’ebé Agência TATOLI asesu, kinta ne’e.

Iha diskusaun ne’e, Ministru Koordenadór Asuntu Ekonómiku, Joaquim Amaral tama nu’udar membru konsellu foun bazeia ba Lei Orsamentu Jerál Estadu tinan 2020.

Reuniaun ne’e partisipa hosi Ministra Negósiu Estranjeiru no Kooperasaun, Adaljiza Albertina Xavier Reis Magno, Ministru Joaquim Amaral, Ministra Saúde, Odete Maria Freitas Belo, inklui ekipa tékniku ministériu sira.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here