Komisariu CAC, Sergio Hornai. Imajen Tatoli/Antonio Goncalves

DILI, 29 outubru 2020 (TATOLI)-Komisáriu Komisaun Anti-Korrupsaun (CAC), Sergio Hornai, hateten, atu kombate korrupsaun iha ámbitu Timor-Leste nian presiza servisu mútua hosi parte hotu.

Durante   konsultasaun públiku ba dezenvolvimentu planu estratéjiku CAC periodu 2021-2025, hosi loron 27 to’o loron 28 outubru, foin lalais ne’e,  iha Salaun João Paulo II, Comoro, Dili, ne’ebé partisipa  hosi instituisaun Estadu, sosiedade sivíl, intelektuál sira, maioria iha sira-nia palestra fó rekomendasaun ida pertinente tebes ba CAC atu hotu-hotu hamutuk luta kombate korrupsaun.

“Materia lubuk mak oradór sira aprezenta importante tebes ba CAC ba elaborasaun planu estratéjiku, tanba ne’e presiza servisu ida iha resiprosidade  mutual entre setór públiku no parte hotu ba kombate kriminalidade korrupsaun,” Komisáriu Sergio Honai, hateten ba Agência Tatoli, ohin.

Nia hatutan, presiza hametin koordenasaun  liuhosi planu estratéjiku ida bele abranje parte hotu iha perspetiva kriminalidade, governasaun di’ak, kontrolu iha vizaun ida hanesan hodi  hametin Estadu direitu ba iha kombate  korrupsaun.

Sergio Hornai afirma, alvu hosi planu estratéjiku maka hakarak impede krime korrupsaun atu labele buras no sistema sira ne’ebé mak bele lori burokrasia, atu garante servisu  efisiénsia ho efikás ka transparente.

Sergio Hornai, dehan, konsultasaun públiku ne’e parte sira fó sira nia persesaun hanesan relativamente  orientada ba kombate kriminalidade korrupsaun.

Nia dehan, tinan 10 ezisténsia CAC ba kotuk iha progresu lubuk mak alkansa ne’ebé iha kazu balun lori ba ona Tribunál no iha ona desizaun definitivu no balun kontinua la’o ,maibé iha dezafiu balun sai satan  tanba ne’e presiza servisu mútua parte sira ho di’ak liután.

Nia dehan, presiza mós  konsolida instituisaun tenke metin, kuadru legal natoon, rekursu umanu, apoiu finanseiru ho sira seluk tan ho natoon,  nune’e bele fó resposta ba servisu sira  tuir meta ne’ebé iha ho di’ak liután.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here