Antigu Prizaun Weberek, Postu Administrativu Alas, Munisípiu Manifahi. Imajen/Mídia MJ

DILI, 29 outubru 2020 (TATOLI)Governu  planeia ona atu konstrui antigu Prizaun Weberek, Postu Administrativu Alas, Munisípiu Manufahi,  liuhosi planu atividade Ministériu Justisa nian ba tinan 2020-2023.

Refere ba planu ne’e, Ministru Justisa (MJ), Manuel Cárceres da Costa, akompaña hosi ekipa téknika hosi Gabinete Primeiru-Ministru no Diretór Nasionál Servisu Prizionál no Reinsersaun Sosiál, foin lalais ne’e,  hala’o vizita ba Weberek, hodi observa besik kondisaun antigu estabelesimentu prizionál ne’ebé konstrui hosi  governu Portugés iha terrenu ho luan ektare atus ida neen (106).

Ministru Justisa (MJ), Manuel Cárceres da Costa, akompaña hosi ekipa téknika hosi Gabinete Primeiru-Ministru no Diretór Nasionál Servisu Prizionál no Reinsersaun Sosiál, foin lalais ne’e, hala’o vizita ba Weberek, hodi observa besik kondisaun antigu Prizaun Weberek. Imajen/Mídia MJ

Komunikadu imprensa ne’ebé Agência Tatoli asesu hosi  Gabinete MJ, ohin, haktuir katak, planu instalasaun  estabelesimentu Prizionál Weberek tama mós iha  planu atividade ministériu justisa nian ba tinan 2020-2023 ne’ebé distribui ona ba iha membru Governu sira.

Ministériu Justisa rasik  sei inisia atividade ba planu refere iha  tinan fiskál 2022   hodi halo rekonstrusaun  no sei uza ba estabelesimentu Prizionál foun iha tempu ukun-an ne’e.

“2021 ita seidauk halo, imi fó tempu ami, halo dezeñu, no ami  buka osan.   Maromak  tulun maka iha 2022 ita hahú,” Ministru Manuel Cárceres hateten.

Ministru mós husu ona ba enjeñeiru sira, katak sira sei halo relatóriu lalais, para husu autorizasaun  Primeiru-Ministru  nian atu bele mai tau uluk arame (kawat berduri) hale’u terrenu ne’ebé pertense ba area antigu prizaun Weberek.

MJ mós sei esforsu atu koordena ho Ministru Obras Públikas atu bele loke uluk estrada, dada eletrisidade no bee-moos antes hahú konstrusaun ba antiga prizaun ne’e.

“Ohin mós ha’u ko’alia ona ho enjeñeira sira katak iha buat tolu mak tenke tau prioridade, hanesan estrada, bee-moos no eletrisidade no ne’e ita sei koordena ho Ministru Obras Públikas,” Ministru Justisa hateten.

VIII Governu liu-husi Ministériu Justisa foti inisiativa atu rekonstrui  hikas estabelesimentu prizionál antiga ne’e tanba haree ba kondisaun estabelesimentu Prizionál-tolu; Becora, Gleno no Suai atu besik over capacity.

Manuel Cárceres, agradese tebes ba  komunidade sira iha Weberek, tanba bele konserva ona rai ne’ebé uluk Estadu Portugés uza hodi harii prizaun refere.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here