labarik mane nain rua faan hela manutolun daan iha jardim Lecidere.Imajen/Antonio Goncalves

DILI, 29 outubru 2020 (TATOLI)—Governu Timor-Leste (TL) liuhosi  Sekretaria Estadu Formasaun Profesionál no Empregu (SEFOPE) no Ministeriu Finansa (MF) hetan apoiu hosi Fundu Nasaun Unida ba Labarik (UNICEF-sigla inglés) no Organizasaun lnternasionál Traballu (ILO, sigla-inglés), hala’o kolokiu ida ho finalidade atu identifika lakuna hodi rezolve no elimina traballadór infantil tanba Governu iha dadus kualitativa.

Sekretariu Estadu Formasaun Profesionál no Empregu (SEFOPE), Alarico de Rosário hateten, objetivu hala’o atividade ida-ne’e atu fahe hanoin hamutuk ho parseiru sira oinsá esforsu atu haree asuntu traballu infantil iha TL ne’e bele elimina.

“Iha ita-nia rai traballu infantil sai hanesan, preokupasaun ba ita hotu tanba ohin loron ita haree iha dalan no iha fatin-fatin, labarik barak menus hosi idade tinan 5 to’o 17, ne’ebé involve iha forma atividade ekonómia iha TL, hanesan kuda modo, faan sasan, iha dalan ninin, traballu domestiku, no servisu iha ristorante. Ne’e hatudu katak partikularmente prejudika labarik sira-nia mentál, saúde, fíziku, no edukasaun. Ne’e hatudu ita tenke tau atensaun másimu,” Alarico de Rosário haktuir liuhusi ninia diskursu iha serimónia workshop kona-ba traballadór infantil iha Timor-Plaza, kinta ne’e.

Nia hatutan, atu redús traballadór infantil iha TL, Governu liuhosi SEFOPE iha nafatin kompromísiu boot atu elimina maibé presiza mós parte hotu-hotu nia kontribuisaun hahú hosi inan-aman ba to’o lidér sira tenke tau atensaun.

Entretantu Reprezentante UNICEF iha TL, Valérie Taton, hateten atu labarik labele lakon nia direitu fundamental ba edukasaun no halimar atu bele servisu ne’e inkredivélmente perigozu ba sira-nia prezente no ba moris future. Tanba, kada labarik iha direitu ba vida infánsia no tenke hetan oportunidade atu realiza sira-nia potensialidade nune’e labele hatodan sira ho responsabilidade, ekonómia durante sira-nia moris.

Iha biban hanesan, Reprezentante ILO ba Indonézia no Timor-Leste, Nívio Magalhães, hateten tuir peskiza ne’ebé ILO hala’o apoiu servisu hamutuk ho Dirasaun Jerál Estatistika iha tinan 2016, rezultadu hatudu katak  traballladór infatil iha TL hamutuk rihun 68 ho 16,1% ne’e maizumenus 12,5% hosi labarik sira tinan 5 to’o 17 mak konsidera hanesan traballu infantil.

“Oinsá atu redus 12% ne’e, husu ita hotu nia kontribuisaun servisu hamutuk atu ita bele redús traballu infantil  iha ita-nia rain. Tanba, ILO nia tema mak proteje labarik sira hosi traballdór infantil agora kedas no liután iha futuru,” Nívio hateten.

Nia hateten, kolokiu ohin loron fornese oportunidade ida ba parte interesadu sira nia responsabilidade atu implementa planu asaun nasionál atu espresa sira-nia nesesidade.

Atu emina traballu infantile, tuir nia, presiza ajuda enkuadra peskiza kualitativa hala’o hosi SEFOPE no MF nia diresaun Jerál estatistika kona-ba trabaldór infantil.

Kolokiu ne’e hala`o iha Dili ne’ebé marka prezensa husi Sekretariu Estadu Formasaun Profesiopnal no Empregu (SEFOPE), Alarico de Rosario, Diretor Geral Estatistika, Ministeriu Finansa, Elias dos Santos Ferreira, Reprezentativa UNICEF iha Timor-Leste, Valérie taton,  no Asesor Nasional ba projeto ERA reprezenta ILO Indonesia-Timor leste nia Reprezentativu País, Nivio Magalhaes.

Jornalista : Nelia Fernandes

Editór: Cancio Ximenes

HAKEREK NO HATÁN

Please enter your comment!
Please enter your name here