CI mantén formasaun jornalizmu kompriensivu ba jornalista mídia online. Imajem/Conselho de Imprensa.

DILI, 29 outubru 2020 (TATOLI)–Conselho de Imprensa (CI) de Timor-Leste hamutuk ho Programa Nasaun Unida ba Dezenvolvimentu (PNUD) mantén formasaun kompriensivu dahaat ba jornalista 21 husi mídia online hodi hasa’e koñesimentu iha área jornalizmu ho dixiplina oioin.

Prezidente Conselho de Imprensa (CI), Virgílio da Silva Guterres, hateten formasaun ne’e realiza bazea ba referénsia lubuk ida relasiona ho krítika públiku nian liuliu ba kualidade notísia ne’ebé mídia sira fó sai.

“Tanba mídia sira fó sai [notísia] liuhusi servisu jornalista nian, entaun Conselho de Imprensa iha interese no iha responsabilidade boot ida atu envolve iha formasaun ida-ne’e,” Prezidente CI hateten kestaun ne’e iha ámbitu lansamentu ba formasaun kompriensivu ne’e iha Maskariñas, Díli, kinta ne’e.

Virgílio Guterres hatutan, formasaun ne’e foka liubá prátika iha terrenu, oinsá mak atu hasoru fonte informasaun sira no husu pergunta ne’ebé konstrutivu liga ba realidade ne’ebé akontese.

Tanba ne’e, prezidente Conselho de Imprensa (CI) husu ba formandu sira atu aproveita di’ak oportunidade ida-ne’e hodi hetan koñesimentu hosi formadór sira.

“Xave ba jornalista mak kapasidade atu kestiona. La’ós ba husu maibé kestiona. Atu ba to’o iha ne’e, ita tenke iha dadus,” Virgílio sujere.

Responsavel ne’e fó hanoin katak formasaun refere realiza bazea ba esperiénsia ne’ebé liu ona iha programa datoluk nian no hetan ona formatu ne’ebé integra entre teoria no prátika.

Dixiplina ba formasaun mak hanesan étika jornalizmu, oinsá dezenvolve artigu, tékniku entrevista, hakerek tuir padraun Tetun, reportajen ba sensível jéneru, seguransa dijitál, foto jornalizmu, planu kobertura, jornalizmu rádiu, on-site visit, prátika news room.

Resprezentante PNUD, Lazima Bhatta, hatete organizasaun internasionál ne’e kompromete apoia nafatin atu kapasita jornalista iha área jornalizmu no jéneru nian.

“Há’u espera katak liuhusi treinamentu ne’e bele halo mudansa ba ita-boot sira-nian dezenvolvimentu kapasidade,” nia dehan.

Ministru ba Asuntu Parlamentár no Komunikasaun Sosiál, Francisco Jerónimo, hateten polítika Governu nian ba jornalista mak kaer nafatin iha Lei Komunikasaun Sosiál katak garante liberdade espresaun, imprensa no asesu ba informasaun.

“Atu garante ida-ne’e, Governu mós respeita jornalista ne’ebé iha nia kódigu étiku rasik. Ami akompaña nafatin formasaun sira ne’ebé fó ba jornalista, ami prontu atu koopera. Tanba Conselho de Imprensa mak ikus fó karteira profissional,” nia hateten.

Governante ne’e dehan formasaun sira-ne’e esensiál liu tanba to’o ohin loron ema sempre kestiona jornalista sira-nian produtu ne’ebé publika sai.

Formasaun kompriensivu ne’e sei realiza durante fulan ida, liuliu ba jornalista foun sira ne’ebé serbisu iha mídia online no realiza iha ambiente foun tanba sei halo atividade vizita iha zona fronteira atu halo kobertura ba asuntu COVID-19.

Relembra katak atividade ne’e ba dahat ona no iha faze dahuluk to’o datoluk realiza iha 2018, 2019 no ba tinan ne’e, semana primeiru sei realiza iha Bobonaru no semana tolu seluk sei hala’o iha Díli.

Totál benefisiáriu ne’ebé hetan ona sertifikadu hosi jornalizmu komprinsivu hamutuk 162 no formadór sira mak hosi CI, PNUD no pareseiru internasionál hanesan Austrália no Southeast Asia Press Alliance no Indonézia.

Jornalista: Maria Auxiliadora

Editór: Cancio Ximenes

HAKEREK NO HATÁN

Please enter your comment!
Please enter your name here