Imajen/Espesial.

DILI, 29 outubru 2020 (TATOLI)—Deputadu Bankada Demokrátiku no Prezidente Partidu Demokrátiku (PN), Mariano Assanami Sabino, propoin projetu-rezolusaun id aba plenária Parlamentu Nasionál hodi rekoñese ativista pro-demokrásia Indonézia no pró independénsia Timor-Leste, Nugroho Katjasungkana sai sidadaun Timor.

Mariano Assanami Sabino hanesan membru RENETIL koñese Nugroho nia kontribuisaun ba prosesu  luta ba libertasaun nasionál povu maubere nian.

Deputadu Assanami propoin ba plenária iha semana kotuk hodi husu Prezidente Parlamentu Nasionál, Aniceto Longuinhos Guterres Lopes, atu tau ajenda.

Nune’e, Prezidente Parlamentu Nasionál konsidera proposta hodi fixa ajenda ho projetu rezolusaun Nú. 61/V(3a) kona-ba atribuisaun nasionalidade timorense ba Nugroho Katjasungkana ba dedikasaun ne’ebé nia halo ba Timor-Leste iha situasaun defísil.

Atu ba diskusaun, proponente Deputadu Mariano Assanami husu ba plenária atu adia lai tanba sei halo ajustamentu dokumentu balun kona-ba Nugroho Katjasungkana nian.

Deputadu Bankada Demokrátiku (PD), Mariano Assanami Sabino, haktuir rai ida-ne’e ukun-aan la’ós de’it esforsu timoroan de’it maibé ema barak iha mundu fó solidariedade inklui Nugroho ne’ebé fó apoia iha tempu risku.

“Ami kuandu halo manifestasaun oioin kolega ne’e sempre apoia lojístika ba ami hanesan hahan, aimoruk ka ema balu lakon, sira mak buka-tuir. Timoroan sira ema kaer, sira mak ba buka-tuir no buka advogadu hodi defende timoroan sira. Esforsu sira-ne’e nia halo liu fali timoroan sira. Agora, nia problema ho saúde ne’ebé perigu tebes. Tanba ne’e, ha’u husu Estadu rekoñese nia hanesan sidadaun Timor hodi bele kura nia moras ne’e,” Assanami informa ba jornalista sira, iha Parlamentu Nasionál, kuarta ne’e.

Nia akresenta, durante ukun aan nia servisu iha-ne’e no to’o ohin loron nia nunka fila ba Indonézia tanba ne’e nia merese sai sidadaun Timor.

“Ha’u nu’udar ema ne’ebé akompaña ninia partisipasaun inklui membru RENETIL sira hotu-hotu hatene, nia ho nia espoza apoia tomak ba rezisténsia ne’e iha Indonézia no ohin nia problema ho saúde, nia moras ne’ebé perigu tebes. Doutór halo ona rekomendasaun, ne’ebé husu para Estadu rekoñese nia hanesan sidadaun timorense, apoia hodi kura nia saúde iha tempu ida badak tanba nia hanesan ona família Timor-Leste. Nia hamutuk ho ita, dezde uluk nia fó vida tomak iha situasaun ne’ebé ke defísil,” nia dehan.

Entretantu, Vise-Prezidente Parlamentu Nasionál, Deputada Maria Angelina Lopes Sarmento, hatutan belun solidariedade luta Nugroho Katjasungkana, simu ona kondekorasaun iha tinan 2017 ho medalla orden Timor.

“Husu ba Sekretáriu Estadu Veteranu no Komisaun Omenajen atu oinsá fó apoiu ba ninia moras ne’ebé mak nia hasoru,” Deputada PLP ne’e propoin.

Deputadu Bankada Partidu Libertasaun Populár (PLP), Abel Pires da Silva mós apoia projetu rezolusaun ne’e hodi rekoñese ativista ne’e hanesan sidadaun Timor

“Ha’u koñese di’ak kompañeiru Katjasungkana, nia moris iha Indonézia iha momentu servisu ho RENETIL. Iha momentu ne’e hanesan dosente iha UIP maibé momentu ne’e, nia husik hela nia servisu nune’e 1999 to’o ohin nia servisu ba Timor-Leste. Ida-ne’e mak eroi ida-ne’ebé tau laran ba Timor entaun ohin nia presiza Estadu nia tulun. Ha’u hanoin Timor-Leste labele taka-matan ba eroi ida-ne’e,” Prezidente Komisaun E (Infraestrutura) ne’e hateten.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here