Prezidente Institutu Nasionál Seguransa Sosiál (INSS), Longuinhos Armando. Imajen Tatoli/Egas Cristovão

DILI, 29 outubru 2020 (TATOLI)–Prezidente Institutu Nasionál Seguransa Sosiál (INSS), Longuinhos Armando hateten iha 04 novembru tinan ne’e, Governu liuhusi  INSS sei loke rejistu ba medida tolu husi rekoopersaun ekonómia nune’e parte Fundu Covid-19 bele halo ona pagamentu.

“Tuir Governu nia orintasaun ba ami tékniku sira, rejistu ba asuntu ida-ne’e durante fulan haat nia laran, iha-ne’ebé rejistu ne’e sei hahú iha 04 novembru to’o iha fevereiru  2021. Hafoin ne’e, marsu 2021 ita tama ona ba iha relatóriu de’it ona. Depoisde rejistu, kada terseiru domingu, ami envia dadus ba Fundu Covid hodi halo pagamentu,” Longuinhos ba Agência Tatoli, iha salaun MSSI, Caicoli, kinta ne’e.

Prezidente INSS hatutan, medida  ba rekooperasaun ekonómia ne’ebé hosi Ministériu Solidariedade Sosiál nia responsablidade hamutuk tolu mak hanesan apoiu ba emprezáriu ne’ebé ke rejistu ona iha seguransa sosiál ka apoiu ba setór informál, segundu, apoiu ba setór naun formál no terseiru mak dispensa 6%,” nia esplika.

Nia hatutan totál orsamentu ne’ebé Governu prevee ba rekoopersaun ekonómika ba medida tolu ne’e hamutuk  millaun $42.

Tuir Prezidente INSS ne’e katak empreza  iha setór formál sira,  hanesan empreza sira ne’ebé iha lisensa ka iha rejistu  komesiál  no atividade komersiál otelaria no seluk tan, foin daudaun parte INSS rejistu hamutuk rihun 5.

Iha rekooperasaun ekonomia, Longuinhos haktuir,  Govern hanoin mós ba  setór naun formál-sira.

“Ohin, iha konferénsia imprensa, ita-boot sira haree, setór naun formál-sira mak hanesan kompañia privadu sira ne’ebé sira na’in sai xefe ba sira-nia an,  sira maka sai traballadór ba sira-nia an,” nia tenik.

Iha fatin hanesan, Ministru Koordenadór Asuntu Ekonomia (MKAE), Joaquim Amaral haklaken planu rekooperasaun ekonómika ba medida tolu ne’e  ho objetivu atu apoia  kompañia sira hosi setór formál no kompañia setór informál sira bele hahú sira-nia atividade ekonómia.

“Medida ida-ne’e medida ida-ne’ebé atu tulun tebes ita-nia ekonomia liuliu ba ita-nia kompañia sira bele funsiona nafatin, más kompañia sira ne’ebé elejível ba iha  rejistu iha seguransa sosiál,” nia subliña.

Nune’e mós, Vise Primeiru-Ministru no Ministra Solidaridade Sosiál, Armanda Berta dos Santos hateten parte MSSI liuhusi INSS sei loke rejistu ba medida rekooperasaun tolu hodi fó apoiu ba iha empreza-sira nune’e bele hakbiit sira-nia atividade ekonomia.

“Rejistu parte INSS mak sei halo no sei hahú  hosi munisípiu sanulu resin rua inklui Rejiaun Administrativa Espesiál Oé-Cusse Ambeno,” Governante dehan.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here